তদন্ত দিয়ক, ন'হলে ক্ষমা খোজকঃ মুখ্যমন্ত্ৰীক উভতি ধৰিছে অখিল গগৈয়ে...

গতিকে তদন্তৰ কোনো দৰকাৰ নাই, সকলো কথা জলজল পটপট হৈ আছে বুলি মন্তব্য কৰি মুখ্যমন্ত্ৰীয়ে তেওঁলোকক নৈতিকভাৱে নিজৰ দায়িত্ব স্বীকাৰ কৰিবলৈ আহ্বান জনায়। মুখ্যমন্ত্ৰীৰ এই ভাষ্যৰ পিছতে পুনৰ জাঙুৰ খাই উঠে অখিল গগৈ। মুখ্যমন্ত্ৰীক উদ্দেশ্যি অখিল গগৈয়ে সামাজিক মাধ্যমত ধাৰাবাহিকভাৱে দিয়ে কেইবাটাও পোষ্ট।

অখিল গগৈয়ে মুখ্যমন্ত্ৰীক উদ্দ্যেশি কয়- মুখ্যমন্ত্ৰীয়ে মিছা অপবাদ দি ধৰা পৰিল আৰু এতিয়া পলাব খুজিছে। এইবাৰ পলাবলৈ দিয়া নহ’ব। নৈতিকতাৰ কথা ক’ৰ পৰা আহিল? কেলেংকাৰী কৰিছো যদি তদন্ত কৰি আমাক শাস্তি দিয়াটোহে মুখ্যমন্ত্ৰীৰ কাম। এই পোষ্টটো দিয়াৰ পিছতে পুনৰ অখিল গগৈয়ে আন এটা পোষ্ট দিয়ে এনেদৰে- Challenge accepted বুলি বৰমতা দেখুৱাই এতিয়া নেজ দাঙি পলাইছে।আমাক তদন্ত লাগে। নহ’লে ক্ষমা খোজক।

মুখ্যমন্ত্ৰীয়ে নিজেই নিজক তদন্ত কৰক বুলি কোৱা কথাষাৰৰ প্ৰত্যুত্তৰ দি অখিল গগৈয়ে কয়- ৰাকেশ পালে তেন্তে এপিএছচি কেলেংকাৰীৰ তদন্ত নিজেই কৰিব লাগিব! যদিহে মুখ্যমন্ত্ৰীৰ নিয়মত তদন্ত হ’ব লাগে।

এনেকৈয়ে এতিয়া তুংগত উঠিছে অখিল গগৈ আৰু মুখ্যমন্ত্ৰীৰ বাকযুদ্ধ।