কথমপি ৰক্ষা পৰিল এয়াৰ ইণ্ডিয়াৰ দুখনকৈ বিমানঃ ৯ খনকৈ কাৰণ দৰ্শোৱাৰ জাননী জাৰি

ডিজিটেল ডেস্কঃ এক ভয়ংকৰ দুৰ্ঘটনাৰ পৰা সৌভাগ্যক্ৰমে ৰক্ষা পৰিল এয়াৰ ইণ্ডিয়াৰ আন এখন বিমান। সোমবাৰৰ দিনটোত দিল্লীৰ পৰা কলকাতা অভিমুখে উৰণ মৰা এখন এয়াৰ ইণ্ডিয়াৰ AI2403 নম্বৰৰ বিমানখনে উৰণৰ মাজতে কাৰিকৰী সমস্যাৰ বাবে উৰণ বন্ধ কৰিবলগীয়া হয়। ঘণ্টাত ১৫৫ কিলোমিটাৰ প্ৰতি ঘণ্টা বেগত চলি থকা বিমানখনত কাৰিকৰী বিজুতি ধৰা পৰাৰ পিছতে পাইলটে Standard Operating Procedure চমুকৈ এছ অ’ পি অনুসৰণ কৰি বিমানখন উৰণ বন্ধ কৰে।

এয়াৰ ইণ্ডিয়াই এক বিবৃতিত কয়, "দিল্লীৰ পৰা কলকাতা অভিমুখে যোৱা AI2403 সংখ্যক বিমানখন আজি উৰণৰ সময়ত এটা প্ৰযুক্তিগত সমস্যা ধৰা পৰাত উৰণ বন্ধ কৰা হয়। যাত্ৰীসকলে অবতৰণ কৰিছে আৰু দিল্লীৰ কৰ্মচাৰীসকলে তেওঁলোকক সহায় আগবঢ়াইছে। যাত্ৰীসকলৰ সুৰক্ষা আমাৰ প্ৰধান অগ্ৰাধিকাৰ।"

ইপিনে, মুম্বাই বিমানবন্দৰত কেৰালাৰ কোচিৰ পৰা অহা আন এখন এয়াৰ ইণ্ডিয়া বিমানে মুম্বাইত অৱতৰণ কৰাৰ সময়ত বৰষুণৰ ফলত ভিজি থকা ৰাণৱেৰ পৰা আঁতৰি যায়। জানিব পৰা মতে এই ঘটনাত বিমানখনৰ কিছু ক্ষতিও হৈছে। তাৰোপৰি ৰাণৱেৰো ক্ষতি হৈছে। 

এক চৰকাৰী সূত্ৰই জানিবলৈ দিয়া অনুসৰি "বিমানখনে অৱতৰণ কৰাৰ পিছতে ৰাণৱেৰ পৰা মাটিলৈ নামি যায়। ফলত তিনিখন ছাইনেজ আৰু চাৰিখন ৰাণৱে এজ লাইট ভাঙি পৰিছে।" অৱশ্যে এয়াৰ ইণ্ডিয়াই প্ৰকাশ কৰা মতে দুয়োখন বিমানেৰে যাত্রীসকল সুস্থ আৰু নিৰাপদ অৱস্থাত আছে।

এয়াৰ ইণ্ডিয়াই এই বিমানখন গ্ৰাউণ্ড কৰি পৰীক্ষা আৰম্ভ কৰিছে। দুজন পাইলটক তদন্ত সমাপ্ত নোহোৱা পৰ্যন্ত ডিউটীৰ পৰা আঁতৰাই পঠিওৱা হৈছে। ইফালে লোকসভাত সোমবাৰে দিয়া তথ্য অনুসৰি যোৱা ৬ মাহত এয়াৰ ইণ্ডিয়াৰ বিৰুদ্ধে ৫টা সুৰক্ষা উলংঘনৰ ঘটনা সংঘটিত হৈছে যাৰ বাবে ৯ খনকৈ কাৰণ দৰ্শোৱাৰ জাননী জাৰি কৰা হৈছে।