পথ দুৰ্ঘটনা প্ৰতিৰোধৰ লক্ষ্য : ঢকুৱাখনাত আৰক্ষী আৰু আবকাৰী বিভাগৰ যৌথ অভিযান...

ডিজিটেল সংবাদ, ঢকুৱাখনা : নৱবর্ষৰ প্ৰাকক্ষণত ঢকুৱাখনা সদৰ থানাৰ আৰক্ষী সস্তম হৈছে সুৰাপায়ী চালক আৰু যান বাহন আইন উলংঘাকাৰীৰ বিৰুদ্ধে । বৃহস্পতিবাৰে নিশা ঢকুৱাখনা আবকাৰী বিভাগৰ যৌথ অভিযান চলে নগৰৰ বিভিন্ন অংশৰ ৰাজপথত । 

সদৰ থানাৰ অ’ চি প্ৰিয়ব্রত গগৈৰ নেতৃত্বত, আবকাৰী বিভাগৰ চক্ৰ বিষয়া পৰাগ চেতিয়াৰ সহযোগত ঢকুৱাখনা ব্লক চাৰিআলি, টাউন তিনিআলি আৰু সদৰ চাৰিআলিত অভিযান চলাই ১০ গৰাকী সুৰামত্ত চালক আৰু যান- বাহন আইন উলংঘাকাৰী চালকক চিনাক্ত কৰে । মুঠ ৫২ গৰাকী চালকৰ "ব্ৰেথ এনালাইজাৰ" পৰীক্ষা কৰাৰ পাছত মুঠ ৭০ হাজাৰ টকা জৰিমনা বিহাৰ লগতে যান- বাহন আইন উলংঘা কৰা ৩ গৰাকী ব্যক্তিৰ পৰা মুঠ ৩ হাজাৰ টকা জৰিমনা সংগ্ৰহ কৰিবলৈ সক্ষম হয় । 

ঢকুৱাখনাত পথ দুৰ্ঘটনা প্ৰতিৰোধৰ লক্ষ্যৰে আৰক্ষী আৰু আবকাৰী বিভাগে ধাৰাবাহিকভাৱে এনে পদক্ষেপ গ্ৰহণ কৰি আহিছে সমগ্ৰ এলেকাত । ঢকুৱাখনা আৰক্ষীয়ে সকলো যান- বাহনৰ চালকক সুৰাপান কৰি বাহন নচলাবলৈ আৰু সকলোকে যান -বাহন আইন মানি চলিবলৈ আহ্বান জনাইছে ।