নগাঁৱত অগপৰ সভাঃ বিজেপিক এৰি দিয়া সমষ্টি ঘূৰাই বিচাৰি প্ৰস্তাৱ গ্ৰহণ

ডিজিটেল সংবাদ, নগাঁওঃ ৰাজ্যখনৰ প্ৰধান আঞ্চলিক ৰাজনৈতিক দল অসম গণ পৰিষদৰ মজিয়াত প্ৰাৰ্থীত্ব কেন্দ্ৰিক সংঘাতে তীব্ৰ ৰূপ ধাৰণ কৰিছে। মাজুলী, বিহপুৰীয়া,গহপুৰ, কমলপুৰকে ধৰি কেবাটাও বিধানসভা সমষ্টি '২৬ ৰ অসম বিধানসভা নিৰ্বাচনত অগপক এৰি দিবলৈ দাবী উত্থাপন হৈ আহিছে। মিত্ৰতাৰ সূত্ৰে এই সমষ্টি সমুহ অগপই বিজেপিক পূৰ্বৰ নিৰ্বাচনত এৰি দিছিল। 

পিছে এই সমষ্টি সমূহ এইবাৰ বিজেপিয়ে অগপক এৰি দিয়াটো বিচাৰিছে দলটোৰ নেতা-কৰ্মীয়ে। ইতিমধ্যে এই সমষ্টি সমূহত অগপৰ বিধান পৰিষদ সমষ্টি কমিটি সমূহে সভা অনুষ্ঠিত কৰি এই সমষ্টি সমূহ অগপক এৰি  দিয়াৰ বাবে দাবী উত্থাপন কৰিছে। এই লৈ দলটোৰ মজিয়াত এক অস্থিৰ পৰিৱেশৰো সৃষ্টি হৈছে। 

ইফালে, অগপৰ সভাপতি অতুল বৰাই দলত সকলোৱে শৃংখলাবদ্ধ হৈ থাকিব বুলি মন্তব্য কৰি কয়, অনুশাসন নমনা কৰা সকলৰ বিৰুদ্ধে ব্যৱস্থা গ্ৰহণ কৰা হব। সভাপতি অতুল বৰাৰ এই সতৰ্কবাণীৰ পিছতে শনিবাৰে অগপৰ নগাঁও- বটদ্ৰৱা বিধান পৰিষদৰ এখন গুৰুত্বপূৰ্ণ সভা অগপৰ নগাঁও সদৰ আঞ্চলিক সমিতিৰ কাৰ্যালয়ত অনুষ্ঠিত হয়।  

কুমুদ চন্দ্ৰ বেজবৰুৱাৰ সভাপতিত্বত অনুষ্ঠিত সভাত প্ৰাক্তন মন্ত্ৰী তথা জেষ্ঠ অগপ নেতা গিৰীন্দ্ৰ কুমাৰ বৰুৱা ,জেষ্ঠ অগপ নেতা পৰাণ কুমাৰ গোহাঞি, দেৱাজ আকবৰ, গোলাপ শইকীয়া, শৰৎ হাজৰিকা, মহিলা নেত্ৰী মামণি বৰা, মুক্তা জয়ছোৱাল, নগাঁও জিলা অগপৰ সাধাৰণ সম্পাদক নিৰঞ্জন বৰা, কমল শৰ্মা, দীপুজ্বল ৰাজখোৱা, বিদ্যুত বৰা আদি বহু কেইজন অগপ নেতাই অংশগ্ৰহণ কৰে। এই সভাতে দুই শতাধিক নেতা-কৰ্মীয়ে অগপত যোগদান কৰে। সভাত অগপ নেতা-কৰ্মী সকলে মিত্ৰজোঁটত থকাৰ পিছতো বিজেপিয়ে অগপৰ তৃণমূল পৰ্যায়ৰ কৰ্মী সকলক গুৰুত্ব নিদিয়াৰ অভিযোগ উত্থাপন কৰে। 

সভাই নগাঁও জিলাত দলৰ সংগঠনিক ভেঁটি শক্তিশালী কৰাৰ স্বাৰ্থত নগাঁও জিলাৰ চাৰিটা বিধানসভা সমষ্টি অগপক এৰি দিবৰ বাবে ব্যৱস্থা লবলৈ অগপৰ কেন্দ্ৰীয় নেতৃত্বক আহ্বান জনায়। সভাত দলীয় নেতা সকলে অগপ দলৰ জৰিয়তেহে অসমৰ স্বাৰ্থ সুৰক্ষিত হব বুলি মন্তব্য কৰে। সভাই ২০২৬ চনৰ বিধানসভা নিৰ্বাচনত অসমৰ ১২৬ টা বিধানসভা সমষ্টিৰ ভিতৰত ৫০ টা বিধানসভা সমষ্টিত অগপই  প্ৰতিদ্বন্দ্বিতা কৰিব লাগে বুলি মত পোষণ কৰে। তদুপৰি নগাঁও জিলাৰ ৭ টা বিধানসভা সমষ্টিৰ ভিতৰত চাৰিটা বিধানসভা সমষ্টিত অগপৰ প্ৰাৰ্থীয়ে প্ৰতিদ্বন্দিতা কৰিব লাগে বুলি সিদ্ধান্ত গ্ৰহণ কৰে। 

এই সভাতে মিত্ৰজোঁট চৰকাৰৰ পৰা অগপ দলৰ কৰ্মী সকল বঞ্চিত হোৱাৰ বিষয়টোৱে প্ৰাধান্য লাভ কৰে। তদুপৰি ভিন ভিন সময়ত মিত্ৰজোঁটৰ দুয়োটা দলৰ মাজত সংঘটিত সংঘাত বিশেষকৈ পঞ্চায়ত নিৰ্বাচনৰ সময়ত‌ নগাঁও জিলাৰ বিভিন্ন স্থানত মিত্ৰদলে বুজাবুজিৰ চুক্তি অমান্য কৰা বিষয়টো গুৰুত্ব সহকাৰে আলোচনা কৰা হয়।

অৱশ্যে গণতান্ত্ৰিকভাবে সভাৰ দাবীসমূহ অগপ নেতৃত্বক অবগত কৰাৰ সিদ্ধান্ত গ্ৰহণ কৰা হয়। সভাই আশা প্ৰকাশ কৰে যে, অগপ নেতৃত্বই ইতিবাচক পদক্ষেপ গ্ৰহণ কৰিব। বিগত পঞ্চায়ত নিৰ্বাচনত নগাঁও-বটদ্ৰৱা বিধানসভা সমষ্টিৰ অন্তৰ্গত অগপৰ নিৰ্বাচিত পঞ্চায়ত প্ৰতিনিধি সকলক সম্বৰ্ধনা জনোৱা হয়।

আনহাতে এই সভাতে বঢ়মপুৰ সমষ্টিটো অগপই বিচাৰে যদিও পূৰ্বৰ চামগুৰি বিধানসভা সমষ্টিৰ পৰা ৬ টাকৈ পঞ্চায়ত বঢ়মপুৰত অন্তৰ্ভূক্ত হোৱাৰ পিছত সেই সকল ভোটাৰে সমষ্টিটোত দিপ্লুৰঞ্জন শৰ্মা আগন্তক নিৰ্বাচনত প্ৰাৰ্থী হোৱাটো বিচাৰিছে । 

ইফালে, বিজেপিৰ এক সূত্ৰ মতে, বিজেপিয়ে নগাঁৱৰ ৰহা সমষ্টিটো এইবাৰ অগপ দলক এৰি দিব। এই লৈ ইতিমধ্যে প্ৰাৰম্ভিক এক সিদ্ধান্ত হৈছে। সেই দিশৰ পৰা চাবলৈ গ’লে আগন্তক বিধানসভা নিৰ্বাচনত অগপই ৰহা বিধানসভাৰ পৰা প্ৰাৰ্থী প্ৰদান কৰাটো নিশ্চিত হৈ পৰিছে।