ঘিলামৰাত সুচল পথ বিচাৰি আছু নামিল ৰাজপথত...

ডিজিটেল সংবাদ,ঢকুৱাখনা: ঢকুৱাখনাৰ পৰা ঘিলামৰা হৈ গোগামুখ সংযোগ কৰা এটা গুৰুত্বপূৰ্ণ পথ হ'ল ২২ নং ৰাজ্যিক ঘাইপথ। গোগামুখ -ঘিলামৰা সংযোগী এই পথটোৱে এতিয়া ৰূপ লৈছে মৰণফাণ্ডৰ। দীৰ্ঘদিন ধৰি লোকনিৰ্মান (পথ) বিভাগে মেৰামতি নকৰা ,বিধায়ক সাংসদৰ এইক্ষেত্ৰত গুৰুত্বহীনতাই জীয়া যন্ত্ৰণা ভোগাই আহিছে নাগৰিকক ।

সাধাৰণ নাগৰিকে এই পথেৰে যাতায়ত কৰি ভোগী অহা নৰক যন্ত্ৰণা উপশম কৰাৰ প্ৰতি এনেবোৰ দায়িত্বশীল পক্ষই প্ৰদৰ্শন কৰা দায়িত্বহীন ভূমিকাত অতিষ্ঠ জনগণ। এই জলন্ত সমস্যাৰ প্ৰতি উদাসীন স্থিতি লোৱা শাসক পক্ষৰ এনে বেপৰোৱা নীতিত অতিষ্ঠ হৈ শনিবাৰে ৰাজহুৱা প্ৰতিবাদ সাব্যস্ত হয় ঘিলামৰাত।

লখিমপুৰ জিলা ছাত্ৰ সন্থাৰ আহ্বান মৰ্মে ঘিলামৰা আঞ্চলিক ছাত্ৰ সন্থাৰ উদ্যোগত আৰু ঢকুৱাখনাৰ ৬ খন আঞ্চলিকৰ সহযোগিতাত শনিবাৰে সাব্যস্ত হয় এই প্ৰতিবাদ। ঘিলামৰা সদৰ তিনি আলিত ছাত্ৰ সন্থাৰ কেন্দ্ৰীয় কাৰ্যনিৰ্বাহক জ্ঞানদীপ বৰা , জিলা ছাত্ৰ সন্থাৰ মুখ্য সাংঠনিক সম্পাদক গৌৰী শংকৰ বৰুৱা , বিত্ত সম্পাদক মাধৱ শইকীয়াৰ উপস্থিতিত দুপৰীয়া ১২ বজাৰ পৰা আৰম্ভ হয় বিক্ষোভ কাৰ্যসূচী।

বিজেপি হুচিয়াৰ, অকমন্য নৱ দলে গ বেক, নিষ্কর্মা প্ৰদান বৰুৱা মূর্দাবাদ, ঘিলামৰা-গোগামুখ ৰাজ্যিক ঘাই পথ মেৰামতি কৰক, ৰাজপথক লৈ ৰাজনীতি নছলিব আদি শ্লোগান দি ঘিলামৰা তিনিআলি উত্তাল কৰি তোলে প্ৰতিবাদী ছাত্ৰ কৰ্মী সকলে।

ঘিলামৰা আঞ্চলিক ভাৰপ্ৰাপ্ত সভাপতি দর্শনা বৰুৱা,লখিমপুৰ জিলা সাংগঠনিক সম্পাদক প্ৰিয়ব্ৰত বুঢ়াগোঁহাইৰ লগতে অসম জাতীয়তাবাদী যুৱ ছাত্ৰ পৰিষদৰ ঘিলামৰা আঞ্চলিকৰ নেতা তপন হাজৰিকা আৰু অনুপম দত্ত,ঘিলামৰা সচেতন মঞ্চৰ সভাপতি ডিম্বেশ্বৰ চাংমাই, ঘিলামৰা উন্নয়ন সমিতিৰ সভাপতি অকণ গোঁহাই আদিয়ে সমৰ্থন আৰু অংশগ্ৰহণ কৰা প্ৰতিবাদী কাৰ্যসূচীত প্ৰতিবাদী দল সংগঠন সমূহে অতি তৎকালীন ভাবে এই গুৰুত্বপূৰ্ণ পথ চোৱা যাতায়তৰ উপযোগী কৰি নিৰ্মান নকৰিলে ইয়াতকৈ অধিক জংগী প্ৰতিবাদী কাৰ্যসূচী ঘিলামৰাবাসীৰ সহযোগত সাব্যস্ত কৰা হব বুলি সকীয়াই দিছে ।

উল্লেখযোগ্য যে ঢকুৱাখনাৰ সৰ্বাংগীন উন্নয়ন আৰু বিকাশৰ দাবী কৰি আধুনিক ঢকুৱাখনাৰ নিৰ্মাতা বুলি বিধায়ক নৱ দলেক কৃতিত্ব জহাই অহা গেৰুৱা বাহিনীক প্ৰত্যাহ্বান জনাই অহা সময়তে ৰাজপথৰ বিধ্বস্ত অৱস্থাৰ বাবে ঘিলামৰাত সাব্যস্ত হোৱা গণ প্ৰতিবাদী কাৰ্যসূচীয়ে সুকীয়া ইংগিত বহন কৰিছে।