পৰ্যাপ্ত জলসিঞ্চন ব্যৱস্থা, কৃষকক সাহায্য প্ৰদানৰ দাবীৰে আছুৰ ৰাজ্যজুৰি প্ৰতিবাদ

ডিজিটেল ডেস্কঃ ৰাজ্যত সৃষ্টি হোৱা খৰাং সদৃশ পৰিস্থিতিৰ বাবে ব্যাপক সমস্যাৰ সন্মুখীন হৈছে কৃষকসকল। এনে পৰিস্থিতিত আজি ৰাজ্যজুৰি সদৌ অসম ছাত্ৰ সন্থাই ৰাজ্যৰ জলসিঞ্চন বিভাগৰ ব্যৰ্থতাৰ বাবে ব্যাপক প্ৰতিবাদ সাব্যস্ত কৰে। প্ৰায় প্ৰতিখন জিলাতে আছুৱে সাব্যস্ত কৰা এই প্ৰতিবাদৰ সময়ত জলসিঞ্চন মন্ত্ৰী অশোক সিংহলৰ ব্যৰ্থতাক আঙুলিয়াই দি তেওঁৰ বিৰুদ্ধে বিভিন্ন শ্লোগান আওৰাই আনকি তেওঁৰ পদত্যাগৰো দাবী কৰে।

আজি এই প্ৰতিবাদৰ মাজতে হোজাই জিলা আছুৱে জিলাখনৰ আয়ুক্তৰ জৰিয়তে ৰাজ্যৰ কৃষি পথাৰসমূহত পৰ্যাপ্ত জলসিঞ্চন ব্যৱস্থা কৰিবলৈ মুখ্যমন্ত্ৰীলৈ দাবীসম্বলিত এক স্মাৰক পত্ৰ প্ৰৰেণ কৰে। ৰাজ্যৰ অন্যান্য জিলাৰ লগতে হোজাই জিলাতো অনাবৃষ্টিৰ ফলত কৃষকে কৃষিকাৰ্যত অসুবিধাৰ সন্মুখীন হৈছে। 

জিলাখনত চৰকাৰৰ পৰিকল্পিত বিজ্ঞানসন্মত জলসিঞ্চন আঁচনিৰ অভাৱত কৃষকসকলে ধানখেতিৰ বতৰত কৃষিকাৰ্যৰ পৰা বিৰত থাকিবলগীয়া হৈছে। আজি প্ৰতিবাদ সময়ছোৱাত আছুৱে অনাবৃষ্টিৰ ফলত ক্ষতিগ্রস্ত কৃষকসকলক এককালীনভাৱে আর্থিক সাহায্য প্ৰদান কৰিবলৈও আহ্বান জনাইছে।

খৰাং সদৃশ পৰিস্থিতিৰ বাবে বাক্সা জিলাতো সদৌ অসম ছাত্ৰ সন্থাৰ আহ্বানত বাক্সা জিলা ছাত্ৰ সন্থাই বিক্ষোভ কাৰ্যসূচী ৰূপায়ণ কৰে। চৰকাৰৰ জলসিঞ্চন ব্যৱস্থাৰ ব্যৰ্থতাৰ প্ৰতিবাদত ৰূপায়ণ কৰা এই কাৰ্যসূচীত ছাত্ৰ সংগঠনটোৱে জলসিঞ্চন বিভাগৰ মন্ত্ৰী অশোক সিংহলৰ পদত্যাগৰ দাবী কৰে। কৃষিকাৰ্যত সহায়ক হোৱাকৈ তাৎক্ষণিকভাৱে উপযুক্ত ব্যৱস্থা গ্ৰহণ কৰিবলৈ চৰকাৰক ছাত্ৰ সন্থাই আহ্বান জনাইছে।

সাম্প্ৰতিক খৰাং সদৃশ পৰিস্থিতিৰ বাবে কৃষকে কৃষিকাৰ্যত পোৱা অসুবিধাৰ বাবে খেতি-পথাৰত সৌৰচালিত জলসিঞ্চন ব্যৱস্থা গ্ৰহণৰ দাবীৰে কামৰূপ জিলা ছাত্ৰ সন্থাই আজি কামৰূপ জিলাতো প্রতিবাদী কাৰ্যসূচী গ্ৰহণ কৰে। ইফালে ৰাজ্য চৰকাৰে খৰাংসদৃশ পৰিস্থিতিৰ সৃষ্টি হোৱা জিলাসমূহৰ কৃষকসকলক ক্ষতিপূৰণ প্ৰদান কৰিব বুলি ঘোষণা কৰিছে।

মুখ্যমন্ত্ৰী ড° হিমন্ত বিশ্ব শৰ্মাৰ অধ্যক্ষতাত দিছপুৰত অনুষ্ঠিত অসম মন্ত্ৰীসভাৰ বৈঠকত এই সিদ্ধান্ত গ্ৰহণ কৰা হৈছে। মন্ত্ৰীসভাৰ বৈঠকৰ পাছত সংবাদমেলত মুখ্যমন্ত্রী ড° শৰ্মাই উল্লেখ কৰিছিল যে, ৰাজ্যত খৰাংসদৃশ পৰিস্থিতিৰ প্ৰতি লক্ষ্য ৰাখি ইয়াক ৰাজ্যিক দুৰ্যোগ বুলি বিবেচনা কৰি মন্ত্ৰীসভাই অসম দুর্যোগ ব্যৱস্থাপনা প্ৰাধিকৰণৰ নীতি অনুসৰি নিৰ্ধাৰিত জিলাসমূহৰ কৃষকসকলক ক্ষতিপূৰ্ণৰ সুবিধা প্ৰদানত অনুমোদন জনাইছে।

খৰাংসদৃশ পৰিস্থিতিৰ সৃষ্টি হোৱা ডিব্ৰুগড়, তিনিচুকীয়া, বঙাইগাঁও, ধুবুৰী, বৰপেটা, বাক্সা, হোজাই, কামৰূপ আৰু চিৰাং আদি জিলাত প্ৰায় ৪০ শতাংশতকৈ কম বৰষুণ হৈছে বুলি মুখ্যমন্ত্রীগৰাকীয়ে উল্লেখ কৰিছিল।