৯০ শতাংশ থলুৱা লোক নিযুক্ত হৈ থকা BVFCL যাব পুঁজিপতিৰ হাতলৈঃ ছাত্ৰ সন্থাৰ বিৰোধিতা

ডিজিটেল ডেস্কঃ বি জে পি নেতৃত্বাধীন কেন্দ্ৰীয় চৰকাৰে দেশৰ ৰাজহুৱা খণ্ডৰ লাভজনক উদ্যোগসমূহ ইটোৰ পিছত সিটোকৈ বিক্ৰী কৰি পুঁজিপতিৰ হাতত দিব বিচাৰিছে ৷ থলুৱা লোক সংস্থাপন হৈ থকা এই উদ্যোগসমূহক বিক্ৰী কৰি থলুৱাৰ অধিকাৰ খৰ্ব কৰিব বিচাৰিছে ৷

নতুন উদ্যোগ স্থাপনৰ প্ৰতিশ্ৰুতি প্ৰদান কৰি শাসনৰ গাদী দখল কৰা বি জে পি চৰকাৰে এফালৰ পৰা সকলো ৰাজহুৱা উদ্যোগ পুঁজিপতিৰ হাতলৈ এৰি দিছে ৷

শেহতীয়াকৈ ভাৰতবৰ্ষৰ প্ৰথম গেছ ভিত্তিক সাৰ উদ্যোগ BVFCL ক বিক্ৰীৰ সিদ্ধান্তই সকলোকে আচৰিত কৰি তুলিছে ৷ এই উদ্যোগটোৱে দেশৰ বিভিন্ন প্ৰান্তত কম মূল্যত সাৰৰ যোগান ধৰি আহিছে ৷ কৃষিৰ ওপৰত নিৰ্ভৰশীল ৰাজ্য অসমৰ লগতে উত্তৰ-পূৰ্বাঞ্চলৰ ৯০% সাৰৰ চাহিদা পূৰাই আহিছে।

চৰকাৰে উদ্যোগটো বিক্ৰীৰ সিদ্ধান্ত গ্ৰহণ কৰাৰ পিছতেই বিভিন্ন প্ৰতিক্ৰিয়াৰ সৃষ্টি হৈছে৷ বৃহস্পতিবাৰে সদৌ অসম ছাত্ৰ সন্থাৰ সাধাৰণ সম্পাদক শংকৰজ্যোতি বৰুৱাই এই বিষয়ত প্ৰতিক্ৰিয়া প্ৰকাশ কৰি কয়- উত্তৰ-পূৰ্বাঞ্চলৰ একমাত্ৰ সাৰ উদ্যোগ নামৰূপ সাৰ কাৰখানা(BVFCL)ৰ ব্যক্তিগতকৰণৰ তীব্ৰ বিৰোধিতা কৰিছোঁ ৷

কৃষিৰ ওপৰত নিৰ্ভৰশীল ৰাজ্য অসমক এই সাৰ উদ্যোগটোৱে খেতিয়কসকলৰ চাহিদা পূৰাই আহিছে ৷ অসমৰ লগতে সমগ্ৰ উত্তৰ-পূৰ্বাঞ্চলৰ ৯০ শতাংশ আৰু দেশৰ বিভিন্ন ৰাজ্যলৈ ৰাসায়নিক সাৰ যোগান ধৰি আহিছে ৷

চৰকাৰীখণ্ডৰ উদ্যোগ হোৱাৰ বাবে খেতিয়কে কম মূল্যত সাৰ ক্ৰয় কৰি লাভৱান হৈ আহিছে ৷ ৰাজ্যৰ এনে এটা বৃহৎ লাভজনক ৰাজহুৱা উদ্যোগক চৰকাৰে বিক্ৰী কৰাৰ সিদ্ধান্ত কেতিয়াও গ্ৰহণযোগ্য নহয় ৷

উদ্যোগটোৰ চতুৰ্থ গোট নিৰ্মাণ কৰি অধিক কাৰ্যক্ষম কৰি তুলিবলৈ ছাত্ৰ সন্থা আৰু নামৰূপবাসী ৰাইজে দুটা দশক ধৰি সংগ্ৰাম কৰি আহিছে ৷ ৰাজনৈতিক পাকচক্ৰত উদ্যোগটোৰ চতুৰ্থ গোটটো আজিও নিৰ্মাণ নহ’ল ৷

২০০৬ চনত তদানীন্তন কেন্দ্ৰীয় চৰকাৰে চতুৰ্থ গোট নিৰ্মাণৰ প্ৰতিশ্ৰুতিৰে আধাৰশিলা স্থাপন কৰিছিল ৷ বি জে পি নেতৃত্বাধীন কেন্দ্ৰ আৰু ৰাজ্য চৰকাৰে নিৰ্বাচনৰ সময়ত উদ্যোগটোক পুনৰুজ্জীৱিত কৰাৰ প্ৰতিশ্ৰুতি প্ৰদান কৰিছিল ৷

শাসনলৈ অহাৰ পিছত কিন্তু কাৰ্যক্ষেত্ৰত অলপো আগনাবাঢ়িল ৷ বৰঞ্চ এতিয়া উদ্যোগটোকেই পুঁজিপতিৰ হাতত গটাই দিবলৈ সিদ্ধান্ত গ্ৰহণ কৰিছে ৷ উদ্যোগটো ব্যক্তিগতকৰণ হ’লে বেছিকৈ প্ৰভাৱান্বিত হ’ব ৰাজ্যৰ চহা কৃষক সমাজ ৷ লগতে ৯০% থলুৱা লোক নিযুক্ত হৈ থকা উদ্যোগটো ব্যক্তিগতকৰণ হ’লে থলুৱা কৰ্মচাৰীসকলৰ সংস্থাপনৰ অনিশ্চয়তা আহি পৰিব ৷

ৰাজহুৱা খণ্ডৰ লাভজনক এই উদ্যোগটোৰ ব্যক্তিগতকৰণ অসমবাসী ৰাইজে কেতিয়াও মানি নলয় । ছাত্ৰ সন্থাই উদ্যোগটোৰ বিক্ৰীৰ সিদ্ধান্ত বাতিল কৰিবলৈ দাবী জনাইছোঁ ৷