ডিজিটেল সংবাদ, কোকৰাঝাৰঃ ৰাজ্যত পুনৰ মৰেল পুলিচ কাণ্ড। মৰেল পুলিচ কাণ্ডত নাম সাঙোৰ খালে ছাত্ৰ সংগঠনৰ। কোকৰাঝাৰ জিলাৰ ছালাকাটিত সংঘটিত হৈছে মৰেল পুলিচৰ ঘটনা।
মৰেল পুলিচৰ ৰূপত ছাত্ৰ সংগঠন এ বি এম ছুৰ নেতৃবৃন্দৰ নাম সাঙোৰ খাই পৰাৰ লগতে দুই লাখ টকা ধন দাবী কৰা বুলিও ছাত্ৰ সংগঠনটোৰ নেতৃবৃন্দৰ বিৰুদ্ধে অভিযোগ উত্থাপিত হৈছে ।
জানিব পৰা মতে, ছালাকাটি আনচাৰিপাৰাৰ নিবাসী চান্দ আলী নামৰ ই-ৰিক্সা চালকগৰাকীক মোবাইল চুৰিৰ অভিযোগত এ বি এম ছুৰ ছালাকাটি আঞ্চলিক কাৰ্যালয়লৈ নি বাহৰ বেটেৰে গুৰুলা-গুৰুলকৈ প্ৰহাৰ কৰে । চালকগৰাকীৰ পৰিয়ালৰ লোকে অভিযোগ কৰা মতে,ছাত্ৰ সংগঠনটোৰ কেন্দ্ৰীয় সহকাৰী সাধাৰণ সম্পাদক মইনুদ্দিন আলী আৰু জামাল আলীৰ নিৰ্দেশত ৰফিক আলী নামৰ লোকজনে ই-ৰিক্সা চালক চান্দ আলীক সংগঠনটোৰ কাৰ্যালয়তে বাহৰ বেটেৰে গুৰুলা-গুৰুলকৈ প্ৰহাৰ কৰে ।
যাৰ ফলত চান্দ আলী গুৰুতৰভাৱে আহত হয় আৰু সম্প্ৰতি কোকৰাঝাৰ আৰ এন বি চিকিৎসালয়ত চিকিৎসাধীন হৈ আছে । পৰিয়ালৰ লোকে অভিযোগ কৰা মতে, এজাহাৰ দিয়া সত্বেও আৰক্ষীয়ে দোষী সকলৰ বিৰুদ্ধে কোনো ব্যৱস্থা গ্ৰহণ কৰা নাই ।
উল্লেখ্য যে, এ বি এম ছুৰ নেতৃবৰ্গই ২ লাখ টকা দাবী কৰিছিল বুলি পৰিয়ালৰ লোকে অভিযোগ কৰিছে । মোবাইল চুৰিৰ অপৰাধত ছাত্ৰ সংগঠনটোৰ মৰেল পুলিচৰ ঘটনাই কোকৰাঝাৰত চাঞ্চল্যৰ সৃষ্টি কৰিছে ।
