প্ৰাৰম্ভিক ৰাজহুৱা প্ৰস্তাৱৰ বাবে ভালেসংখ্যক কোম্পানীয়ে নেচনেল ষ্টক এক্সেঞ্জত দাখিল কৰিছে খচৰা

ডিজিটেল ডেস্ক : প্ৰাৰম্ভিক ৰাজহুৱা প্ৰস্তাৱ চমুকৈ আই পি অ’ৰ বাবে দেশৰ ৯০টাৰো অধিক কোম্পানীয়ে নেছনেল ষ্টক এক্সেঞ্জত দাখিল কৰিছে খচৰা পত্ৰ। ৰাজহুৱাখণ্ডত চামিল হ’ব বিচৰা এই কোম্পানীসমূহে আই পি অ’ৰ জৰিয়তে সংগ্ৰহ কৰিব পাৰিব বহু পৰিমাণৰ ধন। এই মন্তব্য কৰিছে বোম্বে ষ্টক এক্সেঞ্জৰ মুৰব্বী সুন্দৰৰমণ ৰামমূৰ্তিয়ে।  

দেশৰ আটাইতকৈ পুৰণি এক্সেঞ্জৰ মুৰব্বীগৰাকীয়ে জনোৱা মতে, ৰাজহুৱা হ’বলৈ বিচৰা প্ৰতিষ্ঠানসমূহৰ শক্তিশালী পাইপলাইনৰ প্ৰতি লক্ষ্য ৰাখি ভাৰতৰ অভিলেখ ভংগকাৰী মূলধন সংগ্ৰহৰ কাম কাজ ২০২৫ চনতো অব্যাহত থাকিব। বৃহস্পতিবাৰে তেওঁ কয় যে দেশৰ ৯০টাতকৈও অধিক কোম্পানীয়ে ইতিমধ্যে ষ্টক এক্সেঞ্জৰ ওচৰত নিজৰ খচৰা পত্ৰ দাখিল কৰিছে। ইয়াৰ দ্বাৰা কোম্পানীসমূহে চলিত বৰ্ষৰ কোনো এটা মাহত আনুমানিক ১ ট্ৰিলিয়ন টকা  (১১.৬৫ বিলিয়ন ডলাৰ) সংগ্ৰহ কৰিব পাৰিব বুলি আশা কৰিব পাৰি।

এইখিনিতে এটা কথা উল্লেখ কৰা প্ৰয়োজন যে ২০২৪ৰ আগেয়ে বোম্বে ষ্টক এক্সেঞ্জ আৰু নেশ্যনেল ষ্টক এক্সেঞ্জত ৯১টা বৃহৎ প্ৰতিষ্ঠান ৰাজহুৱাকৰণ কৰা হৈছিল। এই কোম্পানীকেইটাই প্ৰাৰম্ভিক ৰাজহুৱা প্ৰস্তাৱৰ জৰিয়তে অভিলেখ সৃষ্টি কৰি সংগ্ৰহ কৰিছিল ১.৬ ট্ৰিলিয়ন টকা।