'ৰঙা টাপু-১৯৮২' লৈ শ্ৰেষ্ঠ অসমীয়া চলচ্চিত্ৰৰ ৰাষ্ট্ৰীয় বঁটাঃ শ্ৰেষ্ঠ সমালোচকৰ বঁটা উৎপল দত্তলৈ

ডিজিটেল ডেস্কঃ ঘোষণা হ’ল ৭১ সংখ্যক ৰাষ্ট্ৰীয় চলচ্চিত্ৰ বঁটা। সেই অনুসৰি এইবাৰ শ্ৰেষ্ঠ অসমীয়া ভাষাৰ ছবিৰ সন্মান লাভ কৰিলে ৰঙা টাপু ১৯৮২ এ। চাৰিগৰাকী নাৰীৰ সহ্য, ধৈর্য, সাহস আৰু ত্যাগৰ হৃদয় কঁপাই যোৱা এটা তেজে ধোৱা কাহিনীৰ আধাৰত নিৰ্মাণ কৰা হৈছিল ‘ৰঙা টাপু–১৯৮২’৷ 

২০২৩ চনৰ নৱেম্বৰত মুক্তি লাভ কৰা ছবিখনৰ পৰিচালক আছিল আদিত্যম শইকীয়া। বিআৰচি চিনে প্ৰডাকচনৰ বেনাৰত নিৰ্মাণ কৰা "ৰঙা টাপু ১৯৮২" ছবিখনৰ প্ৰযোজনা কৰিছে অৰুণ কুমাৰ ৰয় আৰু অজয় কুমাৰ ৰয়ে।

আনহাতে প্রৱাল খাউণ্ডৰ টাইফাকে ভাষাৰ ছবিলৈও আগবঢ়োৱা হৈছে ৰাষ্ট্ৰীয় চলচ্চিত্ৰ বঁটা। তেওঁৰ ‘পাই চাং--ষ্টেপ অব হ’প’লৈ আগবঢ়োৱা হৈছে শ্রেষ্ঠ টাইফাকে ভাষাৰ ছবিৰ সন্মান। 

আনহাতে বিশিষ্ট চিত্ৰ সমালোচক উৎপল দত্তই এইবাৰ লাভ কৰিছে শ্রেষ্ঠ সমালোচকৰ ৰাষ্ট্রীয় বঁটা। শ্রেষ্ঠ নৱাগত পৰিচালকৰ সন্মান লাভ কৰিছে শিল্পীকা বৰদলৈয়ে। তেওঁ অকাহিনী চিত্রৰ শাখাত এই সন্মান লাভ কৰিছে।

শিল্পীকা বৰদলৈ ওঁ ‘দ্য স্পিৰিট ড্রীমছ অব চেৰাও’ৰ পৰিচালক।  এই চিনেমাখন নিৰ্মাণ কৰা হৈছে মিজো ভাষাত।