প্ৰবজিত শ্ৰমিকৰ নাও দুৰ্ঘটনাঃ ৬৮ জনে হেৰুৱালে প্ৰাণ, সন্ধানহীন ৭৪ গৰাকী

ডিজিটেল ডেস্কঃ প্ৰব্ৰজিত শ্ৰমিক কঢ়িয়াই নিয়া এখন নাও দুৰ্ঘটনাত পতিত হোৱাৰ ফলত ৬৮ গৰাকী লোকৰ মৃত্যু হোৱা বুলি জানিব পৰা গৈছে। তাৰোপৰি এতিয়াও সন্ধানহীন হৈ আছে ৭৪ জনকৈ লোক। তাৰোপৰি জীৱন্তে উদ্ধাৰ কৰা হৈছে ১২ জন শ্ৰমিকক। তেওঁলোকক য়েমনৰ চিকিৎসালয়ত ভৰ্তি কৰোৱা হৈছে।

খবৰ অনুসৰি দেওবাৰে আবিয়ান প্ৰদেশৰ সমীপৰ আডেন উপসাগৰত য়েমেন অভিমুখী ১৫৪ জন প্ৰব্ৰজনকাৰীক কঢ়িয়াই নিয়া নাওখন এডেন উপসাগৰত দুৰ্ঘটনাত পতিত হয়। জাহাজখনত থকা ১৫৪ জন লোকেই ইথিওপিয়াৰ। 

এই দুৰ্ঘটনাৰ পিছতে উদ্ধাৰকাৰীয়ে উদ্ধাৰ অভিযান চলায়। আবিয়ান প্ৰদেশৰ প্ৰব্ৰজিত শ্ৰমিকৰ আন্তঃৰাষ্ট্ৰীয় সংস্থা আন্তঃৰাষ্ট্ৰীয় প্ৰব্ৰজন সংস্থাই প্ৰকাশ কৰা মতে ৫৪ টা মৃতদেহ উদ্ধাৰ কৰি য়েমেনৰ খানফৰ জিলাৰ উপকূললৈ লৈ যোৱা হৈছে।

প্ৰব্ৰজিত এই শ্ৰমিকসকলে ইথিওপিয়াৰ পৰা য়েমেনলৈ কিয় এইদৰে বিপদজনকভাৱে যাত্ৰা কৰিছিল সেই সন্দৰ্ভত বহু প্ৰশ্নই উত্থাপিত হৈছে। খবৰ অনুসৰি বহু বছৰ ধৰি পূব আফ্ৰিকা আৰু আফ্ৰিকা মহাদেশৰ পূব অংশৰ পৰা বহু লোকে অধিক উপাৰ্জনৰ আশাত সাগৰীয় পথেৰে য়েমেনলৈ যাত্ৰা অব্যাহত ৰাখিছে।

তাৰ পৰাই তেওঁলোকে অবৈধভাৱে সাগৰীয় পথেৰে পশ্চিম এছিয়াৰ বিভিন্ন দেশত প্ৰৱেশ কৰিবলৈ চেষ্টা কৰে। আই অ’ এমৰ পৰিসংখ্যা অনুসৰি ২০২৪ চনত ৬০ হাজাৰ প্ৰব্ৰজনকাৰীয়ে য়েমেনত প্ৰৱেশ কৰিছিল। ২০২৩ চনত এই সংখ্যা আছিল ৯৭,২০০ গৰাকী। 

বহু সময়ত এই শ্ৰমিকসকলে এইদৰে প্ৰবজন কৰাৰ সময়ত অসাধু লোকৰ কৱলত পৰে। সেইসকলে এই শ্ৰমিকসকলৰ পৰা টকা সংগ্ৰহ কৰে আৰু তাৰ পিছত সস্তীয়া নাওত উঠাই এইদৰে প্ৰেৰণ কৰে।সেইবাবেই বাৰে বাৰে নাও দুৰ্ঘটনাত এইদৰে শ্ৰমিকৰ মৃত্যু হয়।

স্মৰ্তব্য যোৱা, চলিত বৰ্ষৰ মাৰ্চ মাহত য়েমেনৰ সমীপত চাৰিখন প্ৰব্ৰজিত নাও দুৰ্ঘটনাত পতিত হৈছিল। সেই দুৰ্ঘটনাত সন্ধানহীন হোৱা ১৮৬ গৰাকী লোকৰ আজিও কোনো সম্ভেদ পোৱা নগ’ল।