হেলেম আৰক্ষীৰ অভিযানত ৬৭ লাখ টকা জব্দ

গহপুৰ সমজিলাৰ অন্তৰ্গত হেলেম আৰক্ষী থানাৰ ভাৰপ্ৰাপ্ত আৰক্ষী বিষয়া পংকজ চিতলা আৰু উপ পৰিদৰ্শক মহিবুৰ ৰহমানৰ নেতৃত্বত চলোৱা এক অভিযানত জব্দ কৰা হৈছে ৬৭,৬৯,১০০ টকা।

author-image
Asomiya Pratidin
New Update
AP FOR WEB sayduwar

ডিজিটেল সংবাদ, ছয়দুৱাৰ : গহপুৰ সমজিলাৰ অন্তৰ্গত হেলেম আৰক্ষী থানাৰ ভাৰপ্ৰাপ্ত আৰক্ষী বিষয়া পংকজ চিতলা আৰু উপ পৰিদৰ্শক মহিবুৰ ৰহমানৰ নেতৃত্বত চলোৱা এক অভিযানত জব্দ কৰা হৈছে ৬৭,৬৯,১০০ টকা। জানিব পৰামতে-দেওবাৰে পুৱা প্ৰায় ৯-৩০ বজাত বুৰৈঘাটৰ ১৫ নং ৰাষ্ট্ৰীয় ঘাইপথত উক্ত বিষয়া দ্বয়ৰ নেতৃত্বত যান-বাহনৰ তালাচী চলাই আছিল হেলেম আৰক্ষীৰ এটা দলে।

উক্ত তালাচীৰ সময়ত ইটানগৰৰ পৰা গুৱাহাটী অভিমুখী এআৰ ০১ কে ৮৯০৯ নম্বৰৰ ডাষ্টাৰ গাড়ীখনতো তালাচী চলাই আৰক্ষীৰ দলটোৱে। তালাচীৰ সময়ত গাড়ীখনৰ ভিতৰৰ এটা বেগৰ পৰা উদ্ধাৰ হয় মুঠ ৬৭ লাখ ৬৯ হাজাৰ ১০০ টকা।

অভিযানকাৰী আৰক্ষীৰ দলটোৰ আগত গাড়ীখনত অহা দুই ব্যক্তিয়ে উক্ত টকাখিনিৰ উৎসৰ সন্দৰ্ভত কোনো ধৰণৰ উপযুক্ত তথ্য প্ৰমাণ দেখুওৱাব নোৱাৰাত তেওঁলোকক গাড়ী আৰু টকাসহ থানালৈ লৈ আনে। গাড়ীখনৰ চালকৰ আসনত থকা কমল কুমাৰ নামৰ ব্যক্তিজনৰ আছিল টকাখিনি।

ৰাজস্থানৰ চুৰু জিলাৰ ৰাজশ্বৰ পানওৱাৰনৰ বাসিন্দা বিদ্যা ধৰৰ পুত্ৰ কমল কুমাৰ পেছাত এগৰাকী ব্যৱসায়ী বুলি প্ৰকাশ কৰাৰ লগতে উক্ত টকা তেওঁ পাৰ্টি পেমেণ্টৰ বাবে নিয়া বুলি প্ৰকাশ কৰিছে যদিও উক্ত টকাখিনিৰ উৎসৰ সন্দৰ্ভত কোনো ধৰণৰ তথ্য প্ৰমাণ দিব পৰা নাই। ইপিনে কমল কুমাৰৰ লগত উক্ত গাড়ীখনত সহযাত্ৰী হিচাপে অহা বাসুদেৱ পাৰিককো আটক কৰিছে হেলেম আৰক্ষীয়ে।

ৰাজস্থানৰ চুৰু জিলাৰ ৰতংগৰ আৰক্ষী থানাৰ অন্তৰ্গত গোগাচৰৰ ৭ নং ৱাৰ্ড নিবাসী চংগৰ লালৰ পুত্ৰ বাসুদেৱ পাৰিক।দুয়োজনকে সম্প্ৰতি হেলেম আৰক্ষী থানাত জেৰা চলাই থকা হৈছে।

উল্লেখযোগ্য যে, আয়ৰ বৈধ উৎস অবিহনে এনেদৰে ৰাষ্ট্ৰীয় ঘাইপথৰ মাজেৰে বুজন পৰিমাণৰ ধনৰ সৰবৰাহ হোৱা কাৰ্য্যই স্তম্ভিত কৰি তুলিছে সচেতন ৰাইজক। হেলেম আৰক্ষীৰ এই অভিযানক শলাগ লৈ বৃহত্তৰ হেলেম অঞ্চলৰ ৰাইজে এয়া "ব্লেক মানি" বুলি মন্তব্য কৰিছে সংবাদ মাধ্যমৰ আগত।

ছয়দুৱাৰ