ঢকুৱাখনাত ২৩০০ কৃতীমান শিক্ষার্থীক বিধায়কৰ সম্বৰ্ধনা

ডিজিটেল সংবাদ, ঢকুৱাখনাঃ ঢকুৱাখনা বিধানসভা সমষ্টিৰ হাইস্কুল শিক্ষান্ত পৰীক্ষা, উচ্চতৰ মাধ্যমিক চূড়ান্ত পৰীক্ষা, সৰ্বভাৰতীয় প্ৰতিযোগিতামূলক প্ৰৱেশ পৰীক্ষা আৰু স্নাতক, স্নাতকোত্তৰ পৰীক্ষাত মেধাত্ব প্ৰদৰ্শন কৰিবলৈ সক্ষম হোৱা কৃতীমান শিক্ষাৰ্থী সকলক শনিবাৰে সম্বৰ্ধনা জনোৱা হয়। 

ঢকুৱাখনা নগৰৰ ডুলিয়া গাঁওৰ সমীপৰ সৰলা পথাৰত অৱস্থিত "ছিগনেচাৰ প্ৰকল্প চৌহদত আয়োজিত বিধায়ক নৱ দলে আৰু টিম ঢকুৱাখনাৰ পৃষ্ঠপোষকতাত অনুষ্ঠিত "পঞ্চদশ বাৰ্ষিক অভিনন্দন অনুষ্ঠান"ত এই সম্বৰ্ধনা জনোৱা হয়। জেংৰাইমুখ মহাবিদ্যালয়ৰ প্ৰাক্তন অধ্যক্ষ তথা কৃষ্ণগুৰু আধ্যাত্মিক বিশ্ববিদ্যালয়ৰ প্ৰাক্তন পঞ্জীয়ক ড° কমলা কান্ত দত্তৰ সঞ্চালনাত অনুষ্ঠিত জনাকীৰ্ণ সভাত অসম শিশু সাহিত্য ন্যাসৰ সচিব, সাহিত্যিক হৃষিকেশ গোস্বামীয়ে মুখ্য বক্তা হিচাবে তত্ত্ব গধুৰ বক্তব্য আগবঢ়ায়।

বিধায়ক দলেৰ উদ্যোগত অনুষ্ঠিত এই সম্বৰ্ধনা সভাত লখিমপুৰ লোকসভা সমষ্টিৰ সাংসদ প্ৰদান বৰুৱা, মিচিং স্বায়ত্তশাসিত পৰিষদৰ অধ্যক্ষ সুনীল পেগু, ঢকুৱাখনা সম জিলা আয়ুক্ত কাৰ্তিক কলিতাৰ লগতে বহু সংখ্যক বিশিষ্ট ব্যক্তি, শিক্ষাবিদ, অভিভাৱক ৰাইজ উপস্থিত থাকে। বিধায়ক দলেৰ উদ্যোগত অনুষ্ঠিত পঞ্চদশ বাৰ্ষিক এই সম্বৰ্ধনা অনুষ্ঠানত সমষ্টিটোৰ প্ৰায় ২৩০০ গৰাকী মেধাৱী শিক্ষার্থীক সম্বৰ্ধনা জনোৱা হয়।