/asomiyapratidin/media/media_files/2025/07/26/new-ap-web-2-8-2025-07-26-22-26-34.jpg)
ডিজিটেল সংবাদ, লখিমপুৰঃ জিলা আৰক্ষী অধীক্ষক গুনেন্দ্ৰ ডেকাই সদৰি কৰা তথ্য অনুসৰি, লখিমপুৰৰ বাইপাছত গৰুভৰ্তি ট্ৰাক আৱদ্ধ কৰি শুকুৰবাৰে সন্ধিয়া একাংশ আমছু নেতা-কৰ্মীয়ে ধন দাবী কৰাৰ লগতে চালকক মাৰপিট কৰে ৷ গৰু বেপাৰী আৰু ট্ৰাকৰ চালকৰ অভিযোগৰ ভিত্তিত লখিমপুৰ আৰক্ষীয়ে নিশাই অভিযান চলাই ১২ জন আমছু নেতা-কৰ্মীক গ্ৰেপ্তাৰ কৰে ৷
শনিবাৰে আমছুৰ ১২জন নেতাক আদালতত হাজিৰ কৰাই জে'ললৈ প্ৰেৰণ কৰা হয় ৷ এই ঘটনাই লখিমপুৰত তীব্ৰ চাঞ্চল্যৰ সৃষ্টি কৰিছে৷ আৰক্ষীৰ মতে, গোগামুখৰ পৰা খাৰুপেটিয়ালৈ বুলি এএচ০৭-এফচি-৭২৯১ নম্বৰৰ ট্ৰাকত ৩৪ টা গৰু আনি থকাৰ সময়তে লখিমপুৰৰ বাইপাছত গৰুভৰ্তি ট্ৰাকখন ২০-২৫ জনীয়া দল এটাই আগচি ধৰি গাড়ীখন ৰখোৱাৰ লগতে চালকক মাৰধৰ কৰে ৷ অভিযোগ অনুসৰি ঘটনাস্থলীতে যুৱকৰ দলটোৱে মাৰধৰ কৰি গৰু বেপাৰীৰ পৰা ১৫ হাজাৰ টকা লয় ৷
এই ঘটনা সন্দৰ্ভত গৰু বেপাৰী ৱহিদুল ইছলামে আৰক্ষীক সমস্ত কথা বিৱৰি কৈ গৰু কঢ়িয়াই অনা গাড়ীখন ৰখাই থোৱা স্থানলৈ যায় ৷ সেই স্থানত গৰুবেপাৰী উপস্থিত হোৱাত যুৱকৰ দলটোৱে তেওঁকো বেয়াকৈ মাৰধৰ কৰে৷ ঘটনা সন্দৰ্ভত নাওবৈচা ভৰলোৱাৰ গৰু বেপাৰী ৱাহিদুল ইছলামে আৰক্ষীক এজাহাৰ দিয়াত আৰক্ষীয়ে ঘটনাৰ লগত জড়িত ১২ জন আমছু নেতা-কৰ্মীক গ্ৰেপ্তাৰ কৰে৷
শনিবাৰে এই সন্দৰ্ভত লখিমপুৰ জিলাৰ আৰক্ষী অধীক্ষকে সংবাদ মাধ্যমক জনোৱা অনুসৰি, গৰুৰ মালিকে দিয়া এজাহৰৰ ওপৰত ভিত্তি কৰি আৰক্ষীয়ে ২৫২য২০২৫ ইউ এছ-১২৬[২]য৩১০[২]য১১৮[২] বি এন এছ ২০২৩ নম্বৰত গোচৰ ৰুজু কৰি আব্দুল হুছেইন, ফাৰুক হুছেইন, ফৰিজুল হক, ৰফিকুল উদ্দিন আহমেদ, বিকি মণ্ডল, নাজমল হ’ক, চহিদুল আলি, মাইনুল ইছলাম, জাহাৰুল ইছলাম, আল্লাউদ্দিন খিলজি, চেলিম লস্কৰক গ্ৰেপ্তাৰ কৰি জেললৈ প্ৰেৰণ কৰা হৈছে ৷ ইয়াৰে জিয়াৰুল ইছলাম হৈছে লখিমপুৰ জিলা সংখ্যালঘু ছাত্ৰ ইউনিয়নৰ সভাপতি, মাইনুল ইছলাম, আল্লাউদ্দিন খিলিজি হৈছে আমছুৰ জিলা সাধাৰণ সম্পাদক৷