ডিজিটেল সংবাদ ,ঢকুৱাখনা: ঢকুৱাখনা মহকুমাৰ ১নং থেকেৰাগুৰি গাঁও হৰিমন্দিৰৰ ভদিয়া নামৰ প্ৰসাদৰ বিষক্ৰিয়া ঘটনাৰ প্ৰতিক্ৰিয়া এতিয়াও মাৰ যোৱা নাই। বিগত ৫ দিন অতিক্ৰম কৰাৰ পাছত আক্ৰান্ত সকলৰ একাংশই আৰোগ্য লাভ কৰিছে।

ঢকুৱাখনা মহকুমা প্ৰশাসনে এই ঘটনা সন্দৰ্ভত এক দণ্ডাধীশ পৰ্যায়ৰ তদন্ত ঘোষণা কৰাৰ সমান্তৰালভাৱে লখিমপুৰ জিলা খাদ্য সুৰক্ষা বিভাগ , মহকুমা খাদ্য আৰু অসামৰিক যোগান ও গ্ৰাহক পৰিক্ৰমা বিভাগৰ লগতে স্বাস্থ্য বিভাগে নিজা ববীয়া তদন্ত কৰি নাম প্ৰসঙ্গত ব্যৱহৃত খাদ্য সামগ্ৰীৰ প্ৰয়োজনীয় নমুনা সংগ্ৰহ কৰিছিল । স্বাস্থ্য বিভাগে হৰিমন্দিৰৰ পানীৰ উৎস আৰু ৭ গৰাকী আক্ৰান্ত ব্যক্তিৰ শৌচৰ নমুনা সংগ্ৰহ কৰিছিল ।

শেহতীয়াভাৱে লখিমপুৰ জিলাৰ ডি পি এইচ এল কৰ্তৃপক্ষই স্বাস্থ্য বিভাগে সংগ্ৰহ কৰা হৰিমন্দিৰত ব্যৱহৃত পানী আৰু আক্ৰান্তৰ শৌচৰ নমুনা পৰীক্ষা কৰি প্ৰতিবেদন দাখিল কৰিছে । ডি পি এইচ এল/ এন এল পি /২০২৩/৩৩০ নং স্মাৰক যোগে আই ডি এছ পিৰ "চাৰ্ভিলেন্স অফিচাৰ"লৈ উক্ত প্ৰতিবেদন প্ৰেৰণ কৰিছে ২১ছেপ্টেম্বৰত ।

জিলাৰ এক শীৰ্ষ সূত্ৰই জনোৱা মতে স্বাস্থ্য বিভাগে সংগ্ৰহ কৰা শৌচ আৰু হৰিমন্দিৰৰ দুটাকৈ খোৱা পানীৰ উৎসত দূষিত বীজাণুৰ অৱস্থিতি ধৰা পৰিছে । গৱেষণাগাৰ কৰ্তৃপক্ষই সংগৃহীত শৌচ আৰু পানীৰ নমুনাৰ নিখুঁত " মাইক্ৰ' বায়'লজিকেল এনালাইছিছ " সম্পন্ন কৰাৰ পাছত উক্ত পানীত স্বাস্থ্য হানি কাৰক, অস্বাস্থ্যকৰ বেক্টেৰিয়া উপলব্ধ হোৱাটো নিশ্চিত কৰিছে ।

যিটো বেক্টেৰিয়া সাধাৰণ ডায়েৰীয়া ৰোগ হ'লে ৰোগীৰ শৌচত উপলব্ধ নহয় । উল্লেখ্য যে হৰিমন্দিৰটোৰ চৌহদৰ ভিতৰত দুটা খোৱা পানীৰ উৎস আছে । এটা কুঁৱা আৰু এটা নলীনাদ । এই দুয়োটাৰে পানীৰ নমুনা ১৮ ছেপ্টেম্বৰত সংগ্ৰহ কৰি ২১ ছেপ্টেম্বৰত এই প্ৰতিবেদন দাখিল কৰিছে লেব'ৰটৰী কৰ্তৃপক্ষই।

স্বাস্থ্য বিভাগৰ শীৰ্ষ কৰ্তৃপক্ষই অনাগত সময়ত এই পানীৰ উৎসত বেক্টেৰিয়া নাশক দ্ৰব্য ব্যৱহাৰেৰে পানী পৰিশোধিত আৰু বিশুদ্ধ কৰিব। পৰৱৰ্তী সময়ত পুনৰ নমুনা সংগ্ৰহেৰে পৰীক্ষা কৰি ব্যৱহাৰৰ উপযোগী কৰি তোলাৰ প্ৰয়োজনীয়তা "অসমীয়া প্ৰতিদিন ডিজিটেল"ৰ আগত ব্যক্ত কৰে ।

Test

Related Stories