ডিজিটেল ডেস্ক : গুৱাহাটী বিশ্ববিদ্যালয়ৰ যোগাযোগ আৰু সাংবাদিকতা বিভাগৰ উদ্যোগত ১২ ছেপ্টেম্বৰ বৃহস্পতিবাৰে ভাৰতীয় জ্ঞান ব্যৱস্থাৰ (Indian Knowledge System) এক জনপ্ৰিয় বক্তৃতানুষ্ঠান অনুষ্ঠিত হয়। বাৰাণসীৰ আই আই টি (বি এইচ ইউ)ৰ ভৌতিক ৰসায়নবিদ তথা আই কে এছত ইউ জি চিৰ পাঠ্যক্ৰম উন্নয়ন সমিতিৰ সদস্য, অধ্যাপক ভি ৰামনাথনে গুৱাহাটী বিশ্ববিদ্যালয়ৰ দূৰত্ব আৰু অনলাইন শিক্ষা কেন্দ্ৰত “ A Fragrant Story: History and Self-Reliance of Sandalwood in India” শীৰ্ষক এই বক্তৃতা প্ৰদান কৰে।
অধ্যাপক ৰামনাথনে তেওঁৰ বক্তৃতাত বেদ, মিলিন্দা পান্হা, বৃহৎ-সংহিতাৰ দৰে প্ৰাচীন ভাৰতীয় গ্ৰন্থৰ আধাৰত চন্দনৰ চহকী, ঐতিহাসিক আৰু সাংস্কৃতিক তাৎপৰ্য্যৰ কথা উল্লেখ কৰে । আধ্যাত্মিক, প্ৰতীকী আৰু অৰ্থনৈতিক মূল্যৰ বাবে শাস্ত্ৰসমূহে চন্দনক কেনেদৰে স্বীকৃতি দিয়ে, সেই বিষয়ে তেওঁ আলোকপাত কৰে।
তেওঁ ভাৰতীয় জ্ঞান ব্যৱস্থাৰ চহকী ঐতিহ্যৰ ওপৰত গুৰুত্ব আৰোপ কৰাৰ লগতে সময়ৰ লগে লগে চন্দনৰ সুগন্ধি সংৰক্ষণ কৰাৰ ব্যতিক্ৰমী ক্ষমতাৰ ওপৰত এক ব্যাখ্যা আগবঢ়ায়। উল্লেখযোগ্য যে, আধুনিক সুগন্ধিৰ ক্ষণস্থায়ী সুবাসৰ বিপৰীতে চন্দনৰ সুগন্ধি বহু যুগলৈকে অক্ষুন্ন থকাৰ বৈশিষ্ট্যৰ বৈজ্ঞানিক ব্যাখ্যা আগবঢ়ায়।
অধ্যাপক ৰামনাথনে বহনক্ষম চন্দন খেতিৰ প্ৰয়োজনীয়তাৰ ওপৰতো আলোকপাত কৰে। বৈজ্ঞানিক উন্নতিৰ সৈতে পৰম্পৰাগত জ্ঞানৰ সংমিশ্ৰণৰ পোষকতা কৰি এই ক্ষেত্ৰৰ আগ্ৰহী গৱেষকসকলক এই সন্দৰ্ভত গৱেষণা কৰিবলৈ আমন্ত্ৰণ জনায়।
অধ্যাপক ৰামনাথনে চন্দন কাঠৰ প্ৰসাধন সামগ্ৰীৰ সম্পৰ্কে প্ৰাচীন কালৰ পৰা সমসাময়িক বিমানবন্দৰৰ প্ৰদৰ্শনীলৈকে পৰম্পৰাগত পদ্ধতি আৰু সামগ্ৰীৰ স্থায়ী মূল্যৰ ওপৰতো বিশেষ গুৰুত্ব প্ৰদান কৰে । তেখেতৰ উপস্থাপনৰ জৰিয়তে, মধ্যযুগত একালৰ ভাৰতীয় সম্ৰাটে আৰু পাছত ব্ৰিটিছ ঔপনিবেশিকতাই কি দৰে চন্দনৰ অতিমাত্ৰা শোষণ আৰু অপব্যৱহাৰ কৰিছিল সেই বিষয়তো গভীৰভাৱে আলোচনা কৰে।
অনুষ্ঠানত উপস্থিত থাকি বিশ্ববিদ্যালয়ৰ দূৰ আৰু অনলাইন শিক্ষা কেন্দ্ৰৰ সঞ্চালক ড⁰ দেৱহৰী তালুকদাৰে আদৰণি ভাষণত কয় যে এনেধৰণৰ কাৰ্যসূচীয়ে যুৱ গৱেষকৰ মন জগাই তোলে আৰু বিষয়টোৰ প্ৰতি অধিক আগ্ৰহী কৰে । কলেজ ডেভেলপমেণ্ট কাউন্সিল , গুৱাহাটী বিশ্ববিদ্যালয়ৰ সঞ্চালক অধ্যাপক প্ৰদীপ ফুকনে তেওঁৰ ভাষণত কয় যে এনে বক্তৃতাই আন্তঃশাখা অধ্যয়ন আৰু গৱেষণাক সুদুৰ প্ৰসাৰিত কৰিব।
বক্তৃতানুষ্ঠান কাৰ্যসূচীৰ সমন্বয়ক ড ⁰ ভাৰতী ভড়ালীয়ে মতামত আগবঢ়াই যে ৰাষ্ট্ৰীয় শিক্ষা নীতি ২০২০ ( এন ই পি ২০২০ ) ৰ অন্যতম কেন্দ্ৰবিন্দু আই কে এছ আধাৰিত এনেধৰণৰ আলোচনাই গুৱাহাটী বিশ্ববিদ্যালয়ৰ ছাত্ৰ-ছাত্ৰীসকলক অসীমভাৱে উপকৃত কৰিব। যোগাযোগ আৰু সাংবাদিকতা বিভাগে প্ৰথম বাৰৰ বাবে আয়োজন কৰা এই কাৰ্যসূচীত গুৱাহাটী বিশ্ববিদ্যালয়ৰ উপাচাৰ্যৰ বিশেষ বিষয়া ড⁰ সঞ্জয় দত্তৰ লগতে বিভিন্ন বিভাগৰ অধ্যাপক অধ্যাপিকা , গৱেষক আৰু ছাত্ৰ-ছাত্ৰীয়ে অংশগ্ৰহণ কৰে।
