ডিজিটেল সংবাদ,গুৱাহাটী : গুৱাহাটী মহানগৰীৰ সৰুসজাইৰ নালাপাৰাৰ লক্ষ্মী- নাৰায়ণ মন্দিৰত শনিবাৰে দিনজোৰা কাৰ্যসূচীৰে ধনৰ অধিষ্ঠাত্ৰী দেৱীক আৰাধনা কৰা হয়। লক্ষ্মী-নাৰায়ণ সামূহিক- সাংস্কৃতিক কেন্দ্ৰ পৰিচালনা সমিতিৰ উদ্যোগত পালন কৰা পূজাত পুৱাৰ পৰা নিশাপর্যন্ত যথেষ্ট ভক্তৰ সমাগম হোৱা দেখা যায়।
পূজাৰ লগত সংগতি ৰাখি প্ৰকাশ কৰা স্মৃতিগ্রন্থ 'যুগল প্রপঞ্চ' উন্মোচন কৰে শিক্ষাবিদ দেৱেন শৰ্মাই। অনুষ্ঠানত ২০২২-২৩ বৰ্ষৰ হাইস্কুল শিক্ষান্ত পৰীক্ষা আৰু উচ্চতৰ মাধ্যমিক চূড়ান্ত পৰীক্ষাত ৭৫ শতাংশ নম্বৰ লাভ কৰা স্থানীয় মেধাৱী ছাত্ৰ-ছাত্ৰীৰ লগতে বিশিষ্ট ব্যক্তিক সমিতিয়ে সম্বর্ধনা জনায়।
সম্বর্ধনা জ্ঞাপন অনুষ্ঠানত ২৪ নম্বৰ ৱাৰ্ডৰ পাৰিষদ বিজু মেধিও অতিথি হিচাপে উপস্থিত থাকে। সন্ধিয়া যথাৰীতি অনুসৰি পূজাভাগ আৰম্ভ হয়।
উর্মিলা দাসৰ দলে পৰিবেশন কৰা নাগাৰা নামে উপস্থিত ভক্তিপ্ৰাণ লোকক আপ্লুত কৰে। উল্লেখযোগ্য যে দিনজোৰা কাৰ্যসূচী অনুসৰি লক্ষ্মী-নাৰায়ণ সামূহিক-সাংস্কৃতিক কেন্দ্ৰ পৰিচালনা সমিতিয়ে শনিবাৰে পুৱা ৭ বজাত পৰিবেশ নিকাকৰণ, ৯ বজাত বন্তি প্ৰজ্বলন আৰু ভাগৱত পাঠ, ১১ বজাত আয়তীৰ নাম- প্ৰসংগ, বিয়লি ৪ বজাত সভা আদি কাৰ্যসূচী ৰূপায়ণ কৰে।
অনুষ্ঠানৰ আঁত ধৰে মঞ্জুৰাণী ডেকা চহৰীয়াই। পূজাৰ সমূহ কাৰ্যসূচীত ৰাইজৰ সহায়-সহযোগিতা তথা উপস্থিতিৰ বাবে সকলোকে ধন্যবাদ জনাইছে পৰিচালনা সমিতিৰ সভাপতি দ্বীপেশ চন্দ্ৰ ৰায় আৰু সম্পাদক সুভাষ শর্মাই।
