ডিজিটেল ডেস্ক: ৰিয়া চক্ৰৱৰ্তী। বলীউডৰ বিতৰ্কিত অভিনেত্ৰীসকলৰ ভিতৰত অন্যতম এইগৰাকী ৰিয়া চক্ৰৱৰ্তী।ব্যক্তিগত জীৱনৰ বাবে দীৰ্ঘদিন ধৰি চৰ্চাৰ শীৰ্ষত আছে এইগৰাকী অভিনেত্ৰী।তিনি বছৰৰ পূৰ্বে সুশান্ত সিং ৰাজপুতৰ সৈতে থকা প্ৰেমৰ সম্পৰ্কৰ বাবে ৰিয়াই বাতৰিৰ শিৰোনাম দখল কৰিছিল।ইয়াৰ পিছত কেৱল বিতৰ্কতে নাম সাঙোৰ খাই আছে এইগৰাকী অভিনেত্ৰীৰ।কিন্তু শেহতীয়াকৈ প্ৰেমৰ সম্পৰ্কৰ বাবে পুনৰবাৰ চৰ্চালৈ আহিছে ৰিয়াৰ নাম। হয়, আকৌ প্ৰেমত পৰিছে ৰিয়া চক্ৰৱৰ্তী।এইবাৰ নিখিল কামাত নামৰ এজন যুৱকৰ প্ৰেমত পৰিছে অভিনেত্ৰীগৰাকী।
কোন এই নিখিল কামাত ?
৩৬ বছৰীয়া নিখিল কামাত এজন প্ৰখ্যাত ব্যৱসায়ী।তেওঁ দেশৰ আটাইতকৈ কম বয়সীয়া যুৱ আৰবপতি।নিখিল জিৰোধাৰ সহ-প্ৰতিষ্ঠাপক।খুব কম বয়সৰ পৰাই কাম কৰা আৰম্ভ কৰি আজি তেওঁ এজন অতি সফল উদ্যোগী হৈছে।ইয়াৰ পূৰ্বে নিখিল ‘মিছ ৱৰ্ল্ড’ মানুষী ছিল্লাৰৰ সৈতে দীৰ্ঘদিনীয়া সম্পৰ্কত আছিল। তেওঁলোক দুয়োৰে বহু ফ’টো-ভিডিঅ’ ইতিমধ্যে ছ’চিয়েল মেডিয়াত ভাইৰেল হৈছিল। কিন্তু কেইমাহমান পূৰ্বে মানুষী আৰু নিখিলৰ মাজৰ সম্পৰ্কত ফাঁট মেলে।ইয়াৰ পাছতেই নিখিলৰ নাম ৰিয়া চক্ৰৱৰ্তীৰ সৈতে সাঙোৰ খাইছে।
উল্লেখ্য যে, ২০২০ চনত অনাকাংক্ষিত মৃত্যুক আকোৱালি লোৱা বলীউডৰ ছুপাৰষ্টাৰ সুশান্ত সিং ৰাজপুতৰ প্ৰেয়সী আছিল ৰিয়া চক্ৰৱৰ্তী।সুশান্তৰ মৃত্যুৰ পাছতেই ৰিয়া খুব বেয়াকৈ সমালোচনাৰ পাত্ৰ হৈ পৰিছিল।তদুপৰি, ড্ৰাগছৰ গোচৰতো কাৰাগাৰলৈ যাবলগীয়া হৈছিল অভিনেত্ৰীগৰাকী আৰু তেতিয়াৰ পৰাই ৰিয়াৰ কেৰিয়াৰৰ গ্ৰাফ তললৈ নামিছিল। কিন্তু শেহতীয়াকৈ তেওঁ পুনৰ দৰ্শকৰ মাজলৈ ঘূৰি আহিছে। হয়, সম্প্ৰতি জনপ্ৰিয় ৰিয়েলিটি শ্ব’ ৰ’ডিজত ব্যস্ত হৈ দৰ্শকক আকৰ্ষিত কৰিছে ৰিয়া চক্ৰৱৰ্তীয়ে।
