কি বাতৰি চাব, সেয়া আপোনাৰ ওপৰতে নিৰ্ভৰ কৰিব...

কি বাতৰি চাব, সেয়া আপোনাৰ ওপৰতে নিৰ্ভৰ কৰিব...
কি বাতৰি চাব, সেয়া আপোনাৰ ওপৰতে নিৰ্ভৰ কৰিব...

তুষাৰ প্ৰতিম

কিয় এনে হৈছে? মানুহৰ মানসিকতাৰ ইমান অৱক্ষয় ! সকলোকে লাগে কেৱল মনোৰঞ্জন। কাৰ ঘৰত কি হৈছে, কোনে কাৰ লগত অবৈধ সম্পৰ্ক ৰক্ষা কৰিছে, কোন চেলিব্ৰেটিৰ কাৰ লগত সম্পৰ্ক আছে এইবোৰ চাবলৈ, জানিবলৈহে যেন সকলোৰে আগ্ৰহ।

ৰাজনীতিৰ কথা বাৰু বাদ দিলো, সামাজিক বিশৃংখলতা, অপসংস্কৃতিৰ পয়োভৰ, ভগ্ন অৰ্থনীতিৰ প্ৰতিও নাই কোনো ভ্ৰুক্ষেপ। মানুহৰ ৰুচিবোধৰ ইমানেই অৱক্ষয় হ'ল যে ভাল কথা, ভাল কামৰ খবৰ জানিবলৈ নাই কাৰো আগ্ৰহ।

সামাজিক মাধ্যমত সততে দেখা পোৱা এক অভিযোগ। আজিৰ সংবাদ মাধ্যমে অলাগতিয়াল খবৰ প্ৰচাৰত অধিক গুৰুত্ব দিয়ে। টি আৰ পিৰ বাবে যিকোনো পৰ্যায়লৈ যায়। মানুহৰ ব্যক্তিগত জীৱনৰ কথাৰে, ব্যক্তিগত কোঠাৰ ভিতৰৰ কথাকেই ৰহণ লগাই বাতৰি কৰি, ভিউজ লোৱাৰ দৌৰত নামিছে আজিৰ সংবাদ মাধ্যম।

একাংশ প'ৰ্টেলৰ দৌৰাত্ম্যৰ বাবেই সকলোকে একাকাৰ কৰি এইচাম মানুহে অভিযোগৰ আঙুলি তোৱাইছে। কিন্তু এয়া সমিচীন নে? আমি বাৰো নিজৰ গাত নিজেই চিকুটি চাইচোনে? আমি কিয় প্ৰশ্ন কৰা নাই এইবোৰ চাই থকা মানুহবোৰ জানো আমাৰ মাজৰে কোনোবা নহয়!

এতিয়া সকলোৰে হাতে হাতে মোবাইল। গোটেই পৃথিৱীখনেই আছে নিজৰ হাতত। ইচ্ছা কৰিলেই যিকোনো এটা বিষয়ৰ ওপৰত জ্ঞান লাভ কৰিব পাৰি। কিন্তু আমি আমাৰ হাতত থকা এই মোবাইলটো কি কামত ব্যৱহাৰ কৰিছো ?

কেইটামান উদাহৰণ দিও। আৰম্ভ কৰো ইউটিউবৰ পৰাই। ইউটিউবত কি নাই? নতুনকৈ পৰিচয় কৰাই দিয়াৰ প্ৰয়োজন নাই। সেয়ে মূল কথালৈ আহো। একাংশই নিজাকৈ ইউটিউব চেনেল খুলি আজিকালি আৰম্ভ কৰিছে ব্লগিং।

নতুন নতুন ঠাইলৈ গৈ, সেইবোৰ ঠাইৰ বিষয়ে অৱগত কৰাৰ ভিডিঅ' ইউটিউবত সহজলভ্য। একাংশই আকৌ আৰম্ভ কৰিছে দৈনন্দিন জীৱনৰ কাম-কাজৰ ব্লগিং। এটা পৰ্যায়লৈ ঠিকেই আছে।

কিন্তু শেহতীয়াকৈ একাংশই এই দৈনন্দিন জীৱনৰ ব্লগিঙৰ জৰিয়তে আৰম্ভ কৰিছে মুকলি যৌনতা বিয়পোৱাৰ প্ৰচেষ্টা। পুৱা বিচনাৰ পৰা উঠাৰ পৰা নিশা বিচনাত পৰি লাইট বন্ধ কৰালৈকে দেখুৱাবলৈ গৈ কাপোৰ সলোৱা, অৰ্ধ নগ্ন হৈ গা ধুৱা, একান্তই ব্যক্তিগত মুহূৰ্তক ব্লগিঙৰ জৰিয়তে প্ৰচাৰ কৰাত নামিছে।

লাখৰ ঘৰত মানুহে এইবোৰ চাবলৈ আৰম্ভ কৰিছে। আন একাংশই ইউটিউবত চলাই আছে ৰোষ্টিং। ৰোষ্টিঙৰ নামত এইসকলে অশ্লীল শব্দৰ প্ৰয়োগ, আশ্ৰাব্য গালি গালাজ, আনৰ ফটো, ভিডিঅ' দেখুৱাই সন্মান হনন কৰাত নামিছে।

এই ৰোষ্টাৰৰ বাবেই বহুলোকে মানসিক অশান্তিত ভূগিবলৈও আৰম্ভ কৰিছে। কোন মুহূৰ্তত এইসকলে সামাজিক মাধ্যমৰ পৰা আপোনাৰ ফটো, ভিডিঅ' সংগ্ৰহ কৰি আপোনাক অশ্লীল শব্দ, গালি গালাজেৰে সন্মান হানি কৰে সেয়া আপুনি তলকিবই নোৱাৰিব। এইবোৰো নিতৌ চাই আছে লাখ লাখ লোকে।

যিমানেই অধিক অশ্লীল গালি, গালাজ, অমাৰ্জিত শব্দৰ প্ৰয়োগ হ'ব সিমানেই ভিউজ বাঢ়িব। আৰু ভিউজ বঢ়া মানেই ইউটিউবৰ পৰা পোৱা ধনৰ পৰিমাণ বৃদ্ধি হোৱা। এতিয়া ইয়াৰ বাবে দায়ী কোন?

ভিউজ পোৱাৰ বাবেই এইবোৰৰ সংখ্যা বৃদ্ধি পোৱা নাইনে? আমি এইসকলৰ বিৰুদ্ধে মাত মাতিচোনে? আনহে নালাগে নতুন বাহনত সন্তানে বিষ্ঠা ত্যাগ কৰাৰ ভিডিঅ' চোৱা লাখ লাখ মানুহ আছে এইখন অসমত। লেট্ৰিন উন্মোচন কৰা ভিডিঅ' চোৱা মানুহৰো সীমা সংখ্যা নাই।

এতিয়া আহো ফেচবুকৰ মাজলৈ। ইয়াতো একেই। ইউটিউবতকৈ ফেচবুক আৰু ওপৰত। যাৰ যি ইচ্ছা তাকেই লিখিছে। সমালোচনাৰ নামত ইয়াত কেৱল ব্যক্তিগত আক্ৰমণ। এই আক্ৰমণ ইমান নিম্নস্তৰলৈ নামিছে যে ইয়াৰ বিৰুদ্ধে মাত মাতিবলৈও কুণ্ঠাবোধ কৰিবলগীয়া অৱস্থাৰ সূচনা হৈছে।

ফেচবুক, ইউটিউবক কেন্দ্ৰ কৰিয়েই প'ৰ্টেল চলি আছে। এই ফেচবুকতে সকলোৱে নিজ ইচ্ছামতে সংবাদ মাধ্যমক গালি, গালাজ কৰাত অকণো কৃপনালী কৰা নাই। সকলোৰে এটাই কথা, নিম্নস্তৰৰ বাতৰি প্ৰকাশ কৰি মূল সমস্যাৰ পৰা জনসাধাৰণক বিপথে পৰিচালিত কৰিছে।

দৰাচলতে এয়া একপক্ষীয় অভিযোগ। হয়, একাংশ সংবাদ মাধ্যমত নিম্নস্তৰৰ বাতৰি প্ৰকাশ হৈছে। প'ৰ্টেলত বাতৰিৰ নামত নেদেখুৱাবলগীয়াকে দেখুৱাইছে, ন'কবলগীয়াকেই কোৱা হৈছে। কিন্তু সকলো একেই নহয়। বহুতেই এতিয়াও সংবাদ মাধ্যমৰ প্ৰকৃত ভূমিকা পালন কৰি আহিছে।

আমি কি চাম, কি পঢ়িম সেয়া আমাৰ নিজৰ ওপৰতে নিৰ্ভৰ কৰিব। কোনটো প'ৰ্টেলে সংবাদ মাধ্যমৰ প্ৰকৃত ধৰ্ম পালন কৰিছে, অতিৰঞ্জিত নকৰাকৈ বাতৰি পৰিৱেশন কৰিছে সেয়া আমি নিজেই বিচাৰ কৰিব লাগিব। কোনেও এইবোৰ চাবলৈ কাকো বাধ্য কৰিব নোৱাৰে।

কিন্তু সেইবোৰ বাতৰিয়েই লাখ লাখ মানুহে চাইছে। অতিৰঞ্জিত ভাৱে প্ৰকাশ কৰা এটা বাতৰি যদি লাখ লাখ মানুহে চাই তেনে সেই নিৰ্দিষ্ট প'ৰ্টেলক পুনৰ তেনে নিউজ কৰিবলৈকে অনুপ্ৰেৰণা দিয়া নাইনে? নক'লেও হয়, অধিকাংশ প'ৰ্টেলেই কেৱল ভিউজ বিচাৰে। আৰু ভিউজ পাবলৈকে এইদৰে লঘু বিষয়কেই বাচি লৈছে।

সামাজিক অৱক্ষয়, ভগ্ন অৰ্থীনিতি, অপসংস্কৃতিৰ বহুল প্ৰসাৰৰ বিৰুদ্ধে বাতৰি প্ৰচাৰ হলেও সেইবাৰক লৈ কাৰো ভ্ৰুক্ষেপ নাই। তথ্যগত খবৰ কোনেও জানিবলৈ, চাবলৈ নিবিচাৰে। নামমাত্ৰ লোকে এইবোৰ চাই যদিও এইবোৰক লৈ চৰ্চা নহয়।

বায়ু প্ৰদূষণৰ ভয়াবহতাক লৈ বাতৰি হৈছে। ইয়াৰ আঁৰৰ কাৰণ, প্ৰতিকাৰ আদিৰ বিষয়ে কোৱা হৈছে। প্ৰদূষণ নিয়ন্ত্ৰণ ব'ৰ্ডৰ দায়িত্ব সোঁৱৰাই দিয়া হৈছে। প্ৰশ্ন উত্থাপন কৰা হৈছে। কিন্তু এইবোৰক লৈ কাৰো মতলব নাই।

কোন অভিনেতাই কোন অভিনেত্ৰীক বিয়া কৰালে তাক লৈ ব্যস্ত সকলো। বিগ বাজেটৰ অসমীয়া চিনেমা হিট হৈছে। ভাল কথা। ইয়াক লৈ চৰ্চাও হৈছে। অসমীয়া চিনেমাৰ বাবে ই নিত্যান্তই ভাল খবৰ। চৰ্চা হোৱা উচিত।

কিন্তু একে সময়তে আন আন অসমীয়া ছবিয়ে হল বিচাৰি হাবাথুৰি খাইছে।ক'ৰবাত যদি এটা প্ৰদৰ্শনীৰ বাবে হল এটা পাইছে তাতো দৰ্শকৰ অভাৱ। অথচ সেই চিনেমাই ৰাজ্যলৈ কঢ়িয়াই আনিছে সন্মান। এইবোৰ বিষয়ক লৈ চৰ্চা নাই।

বাল্য বিবাহক লৈ ৰাজ্য উত্তাল হৈছে। চৰকাৰে কঠোৰ পদক্ষেপ গ্ৰহণ কৰিছে। ঠিকেই আছে। কিন্তু এই বাল্য বিবাহৰ কাৰণ কি, চৰকাৰে ইয়াক প্ৰতিৰোধৰ বাবে উপযুক্ত ব্যৱস্থা লৈছিল নে? এইবোৰ বিষয়ক লৈ চৰ্চা নাই।

এইবোৰ প্ৰশ্নৰে বাতৰিও হৈছে কিন্তু মানুহৰ চাবলৈ, খবৰ লবলৈ আহৰি নাই। কাক জে'ললৈ নিলে, কোনে পথত বাগৰি কান্দিছে তাত হে চকু। সেইবোৰ ভিডিঅ' শ্বেয়াৰ কৰাত ব্যস্ত। মূল সমস্যাক লৈ চিন্তিত নহয়।

উন্নয়নৰ নামত কি হৈছে সেইবোৰৰ বাতৰি হৈছে। চোৱা মানুহ নাই। অৰ্থনীতিৰ বিষয়ে পৰ্যালোচনা হৈছে। জানিবলৈ কাৰো আগ্ৰহ নাই। আগ্ৰহ কেৱল লঘু বিষয়ৰ চৰ্চাত হে।

মানুহৰ ৰুচীবোধৰ সলনি হ'ল। ইয়াৰ আঁৰৰ কাৰণ বহুতো। পাছে পৰে সেয়া আলোচনা কৰিম বাৰো। কিন্তু এই কথা নিশ্চিত ভাৱে আমি সকলোৱে জানো সামাজিক মাধ্যমত আমি যি বিচাৰো সেয়াহে চাব পাৰো।

আমাৰ আগ্ৰহৰ ওপৰতে নিৰ্ভৰ কৰে সকলো। ইউটিউবত কৰা ৰোষ্টিং চাই পৈশাচিক আনন্দ লভিম নে জ্ঞান অৰ্জন কৰিবলৈ নিৰ্দিষ্ট বিষয় বাচি ল'ম সেয়া আমাৰ ওপৰতেই নিৰ্ভৰ কৰিব।

পুৱা উঠি বাথৰুমলৈ গৈ মল, মূত্ৰ ত্যাগ কৰা, উলংগ, অৰ্ধ উলংগ হৈ স্নান কৰা, ভাত খোৱা, মাছ খোৱা, পানী খোৱা, যৌন ক্ৰিয়াত লিপ্ত হোৱাৰ দৰে দৈনন্দিন ব্লগ চাম নে নতুন নতুন ঠাইৰ বিষয়ে, বিভিন্ন জানিবলগীয়া বিষয়ৰ ওপৰত নিৰ্মাণ কৰা ব্লগ চাম সেয়াও আমাৰ ওপৰতেই নিৰ্ভৰ কৰিব।

কোন প'ৰ্টেলে কি বাতৰি পৰিৱেশন কৰিছে সেয়া সকলোৱে লক্ষ্য কৰি আছে। কমেণ্ট বক্সত গৈ সকলোকে একাকাৰ কৰি গালি পাৰাতকৈ যদি তেনে প'ৰ্টেলৰ অতিৰঞ্জিত, অপ্ৰয়োজনীয় খবৰ এৰি চলি তথ্য ভিত্তিত প্ৰকাশিত অথবা সামাজিক, ৰাজনৈতিক, সাংস্কৃতি, শৈক্ষিক, অৰ্থনৈতিক আদি দিশৰ বিভিন্ন সমস্যা, সফলতা আদিৰ ওপৰত প্ৰকাশ কৰা বাতৰি চাই তেন্তে সকলোৱে অন্ততঃ ভিউজ পোৱাৰ আশাতেই সেয়া কৰিবলৈ বাধ্য হ'ব।

এতিয়া সিদ্ধান্ত আপোনাৰ। আপুনি একপক্ষীয় ভাৱে সামাজিক মাধ্যমত সমালোচনা কৰিব নে যুক্তিৰ নামত অশ্লীল গালি গালাজ পাৰিব? ব্যক্তিগত আক্ৰমণেৰে পৰিৱেশ বিনষ্ট কৰিব নে এইবোৰ এৰি চলিব ?

কি বাতৰি চাব, সেয়া আপোনাৰ ওপৰতে নিৰ্ভৰ কৰিব...
আপোচহীনতাৰ বাবেই অখিলৰ বিৰুদ্ধে পুনৰ ষড়যন্ত্ৰঃ ৰাইজৰ দল...

Related Stories

No stories found.
Code:
logo
Asomiya Pratidin
www.asomiyapratidin.in