১ ডিচেম্বৰৰ পৰা বন্ধ হ’ব এছবিআইৰ ইন্টাৰনেট বেংকিং, পঞ্জীয়ন কৰাব লাগিব মোবাইল নম্বৰ

ডিজিটেল ডেস্কঃ যদি আপুনি ইন্টাৰনেট বেংকিঙৰ ব্যৱহাৰ কৰে আৰু এছ বি আইত আপোনাৰ একাউন্ট আছে তেন্তে এই খবৰ আপুনি পঢ়াটো খুৱেই প্ৰয়োজনীয়৷ ষ্টেট বেংক অৱ ইণ্ডিয়াৰ তৰফৰ জনোৱা এক বিবৃতিত কোৱা হৈছে যে ১ ডিচেম্বৰৰ পৰা গ্ৰাহকে ইন্টাৰনেট বেংকিঙৰ জৰিয়তে ধনৰ লেনদেন কৰিব নোৱাৰিব৷ এই খবৰ এছ বি আইৰ নিজা ৱেবচাইটৰ জৰিয়তে ঘোষণা কৰিছে৷

বাতৰি অনুসৰি আৰ বি আইয়ে জাৰি কৰা বেংক সম্বন্ধীয় নিয়মৰ পিছতে এছ বি আইয়ে এই সিদ্ধান্ত গ্ৰহণ কৰিছে৷ জানিব পৰা মতে, এছ বি আইৰ একাউন্টধাৰী গ্ৰাহকৰ মোবাইল নম্বৰ যদি বেংকৰ সৈতে পঞ্জীয়ন কৰা হোৱা নাই, তেন্তে তেনে গ্ৰাহকে ইন্টাৰনেট বেংকিঙৰ সুবিধা লাভ কৰিব নোৱাৰিব৷ অৰ্থাৎ গ্ৰাহকৰ অনলাইন বেংকিং একাউন্টটো বন্ধ হৈ পৰিব৷

১ ডিচেম্বৰৰ পৰা গ্ৰাহকসকলে অনলাইন বেংকিং সেৱাৰ লাভ উঠাবলৈ প্ৰথমে তেওঁলোকৰ মোবাইল নম্বৰটো এছ বি আইৰ নিজা শাখাত পঞ্জীয়ন কৰাব লাগিব৷ পঞ্জীয়ন কৰাৰ পিছত গ্ৰাহকে পূৰ্বৰ ধৰণেই বেংক সেৱা লাভ কৰিব পাৰিব আৰু ইন্টাৰনেট বেংকিং সেৱাও উপলব্ধ হ'ব৷