ভাৰতৰ মোবাইল ফোন ৰপ্তানি ২ লাখ কোটি টকা অতিক্ৰম

ডিজিটেল ডেস্কঃ ভাৰতৰ মোবাইল ফোন ৰপ্তানিয়ে ২০২৪-২৫ বিত্তীয় বৰ্ষত ২ লাখ কোটি টকাৰ সীমা অতিক্ৰম কৰি অভূতপূৰ্ব সাফল্য অৰ্জন কৰিছে। ইণ্ডিয়া চেলুলাৰ এণ্ড ইলেক্ট্ৰনিক্স এছ’চিয়েশ্যন (ICEA)ৰ তথ্য অনুসৰি, পূৰ্বৰ বৰ্ষৰ ১.২৯ লাখ কোটি টকাৰ তুলনাত ২০২৪-২৫ বিত্তীয় বৰ্ষত মোবাইল ফোন ৰপ্তানি ৫৫ শতাংশ বৃদ্ধি হৈছে।

এই সাফল্যৰ জৰিয়তে স্মাৰ্টফোনে পেট্ৰ’লিয়াম আৰু হীৰাৰ দৰে পৰম্পৰাগত পণ্যক অতিক্ৰম কৰি ভাৰতৰ শীৰ্ষ ৰপ্তানি সামগ্ৰী হিচাপে আত্মপ্ৰকাশ কৰিছে। এই অভূতপূৰ্ব সাফল্যৰ মূল কাৰণ হৈছে চৰকাৰৰ ‘মেক ইন ইণ্ডিয়া’ আৰু প্ৰ’ডাকচন লিংকড ইনচেণ্টিভ (PLI) আঁচনি। 

এই আঁচনিয়ে ভাৰতৰ ইলেক্ট্ৰনিক্স উৎপাদন ব্যৱস্থাক শক্তিশালী কৰি বিদেশী বিনিয়োগ আকৰ্ষণ কৰিছে আৰু ভাৰতক বিশ্বৰ ইলেক্ট্ৰনিক্স বজাৰৰ এক গুৰুত্বপূৰ্ণ কেন্দ্ৰস্থল হিচাপে প্ৰতিষ্ঠা কৰিছে। এপল আৰু ছেমচাঙৰ দৰে বিশ্বৰ শীৰ্ষ কোম্পানীয়ে ভাৰতত নিজৰ উৎপাদন সম্প্ৰসাৰণ কৰি এই সাফল্যত অৰিহণা যোগাইছে।

ফলত, মোবাইল ফোনৰ মুঠ উৎপাদন ২০২৪-২৫ বিত্তীয় বৰ্ষত ৫.২৫ লাখ কোটি টকাত উপনীত হৈছে। যি পূৰ্বৰ বৰ্ষৰ ৪.২২ লাখ কোটিৰ তুলনাত যথেষ্ট বৃদ্ধি হৈছে।ICEAৰ অধ্যক্ষ পংকজ মহিন্দ্ৰোৱে এই সন্দৰ্ভত কয়, “২ লাখ কোটি টকাৰ স্মাৰ্টফোন ৰপ্তানি ভাৰতৰ ইলেক্ট্ৰনিক্স খণ্ডৰ শক্তি আৰু বিশ্বায়নৰ প্ৰমাণ। PLI আঁচনিয়ে এই পৰিৱৰ্তনৰ কেন্দ্ৰবিন্দু হিচাপে কাম কৰিছে।”

তেওঁ আৰু কয় যে খৰচৰ প্ৰতিযোগিতা, অবকাঠামো আৰু লজিষ্টিকৰ দৰে কিছু প্ৰত্যাহ্বান এতিয়াও আছে। যিবোৰ সমাধানৰ বাবে কাম চলি আছে।

আমেৰিকাৰ ৰাষ্ট্ৰপতি ড’নাল্ড ট্ৰাম্পৰ শেহতীয়া শুল্ক নীতিয়ে ভাৰতৰ বাবে আমেৰিকাৰ বজাৰত নতুন সুযোগৰ সৃষ্টি কৰিব পাৰে বুলি ICEA-এ প্ৰকাশ কৰিছে। মহিন্দ্ৰোৱে কয়, “আমাৰ লক্ষ্য হৈছে বিশ্বৰ সকলো মুখ্য বজাৰত ভাৰতক পছন্দৰ ইলেক্ট্ৰনিক্স উৎপাদন আৰু যোগানৰ অংশীদাৰ হিচাপে প্ৰতিষ্ঠা কৰা।”

ICEAৰ মতে, ২০৩০ চনৰ ভিতৰত ভাৰতে ৫০০ বিলিয়ন ডলাৰৰ ইলেক্ট্ৰনিক্স উৎপাদন আৰু ৰপ্তানিৰ লক্ষ্যত উপনীত হ’বলৈ এই সাফল্যই গুৰুত্বপূৰ্ণ ভূমিকা পালন কৰিব।