অৰ্থনীতি পৰিবৰ্তন কৰিবলৈ ভাৰতে বিনিয়োগ কৰিছে ১৪ ট্ৰিলিয়ন ডলাৰ

ডিজিটেল ডেস্কঃ স্বাধীনতাৰ পিছৰে পৰা, ভাৰতে নিজৰ অৰ্থনীতি পৰিৱৰ্তনৰ বাবে ১৪ ট্ৰিলিয়ন ডলাৰ বিনিয়োগ কৰিছে। বিশেষকৈ, যোৱা এক দশকতে বিনিয়োগ কৰা হৈছে ৮ ট্ৰিলিয়ন ডলাৰ।

মতিলাল ওছৱালৰ এক প্ৰতিবেদনত এই কথা উল্লেখ কৰা হৈছে। এই সময়ছোৱাত আধুনিকীকৰণ ত্বৰান্বিত কৰিবলৈ আৰু আন্তঃগাঁথনি সম্প্ৰসাৰণৰ বাবে এই বৃহৎ পৰিমাণৰ ধন বিনিয়োগ কৰা হৈছে।

প্ৰতিবেদনখনত স্পষ্টকৈ কোৱা হৈছে যে, "স্বাধীনতাৰ পিছত ভাৰতে ১৪ ট্ৰিলিয়ন ডলাৰ বিনিয়োগ কৰিছে।যাৰ ভিতৰত যোৱা দশকত ৮ ট্ৰিলিয়ন ডলাৰ ব্যয় কৰা হৈছে।"

বিনিয়োগৰ পৰা জিডিপি অনুপাতৰ পুনৰুদ্ধাৰ

প্ৰতিবেদনখনত লগতে কোৱা হৈছে যে ভাৰতৰ বিনিয়োগৰ পৰা জিডিপি অনুপাত ২০১১ চনৰ পৰা স্থবিৰ হৈ আছে। কিন্তু ই এতিয়া পৰিবৰ্তন হ'বলৈ আৰম্ভ কৰিছে।

এয়া সম্ভৱ হৈছে কোভিডমহামাৰীৰ পিছত লোৱা অৰ্থনীতি পুনৰুদ্ধাৰৰ পদক্ষেপ আৰু আন্তঃগাঁথনি উন্নয়ন প্ৰকল্পত চৰকাৰী ব্যয় বৃদ্ধিৰ বাবে। প্ৰতিবেদনখনত কোৱা হৈছে "২০১১ চনৰ পৰা কম হোৱা বিনিয়োগৰ পৰা জিডিপি অনুপাত এতিয়া কোভিডৰ পিছৰ অৰ্থনীতি পুনৰুদ্ধাৰ প্ৰচেষ্টা আৰু চৰকাৰী ব্যয়ৰ বাবে পুনৰুদ্ধাৰ হৈছে।"

মূলধন বজাৰৰ স্থিতিস্থাপকতা

ভাৰতৰ মূলধন বজাৰ হৈছে অৰ্থনৈতিক শক্তিৰ আন এক মুখ্য স্তম্ভ।যি যোৱা ৩৩ বছৰত ২৬ বাৰেই ইতিবাচক লাভ প্ৰদান কৰিছে।

যদিও ভাৰতৰ অৰ্থনীতিত হ্ৰস্বম্যাদী হ্ৰাস, যেনে ১০-২০ শতাংশ লোকচান সঘনাই হয়, তথাপিও বজাৰত দীৰ্ঘম্যাদী বিকাশৰ লক্ষণ দেখা যায়। প্ৰতিবেদনত কোৱা হৈছে, "প্ৰতি বছৰে ১০-২০ শতাংশ অস্থায়ীভাৱে হ্ৰাস হোৱাটো প্ৰায় নিশ্চিত।

ইয়াৰ বাবে বিনিয়োগকাৰীসকলক দীৰ্ঘম্যাদী পদক্ষেপ ল'বলৈ পৰামৰ্শ দিয়া হৈছে।

ভাৰতৰ অৰ্থনৈতিক ভৱিষ্যত উজ্জ্বল আৰু প্ৰতিশ্ৰুতিবদ্ধ

শক্তিশালী বিনিয়োগ বিকাশ আৰু স্থিতিস্থাপক বজাৰৰ সৈতে, ভাৰত নিজৰ স্থিতি শক্তিশালী কৰাৰ পথত। তাৰোপৰি বিশ্বজুৰি অৰ্থনীতিত ভাৰত ''লিডাৰ'' হিচাপে আত্মপ্ৰকাশ কৰিবলৈ সাজু হৈছে।

বিনিয়োগৰ আধাৰ সম্প্ৰসাৰিত হোৱাৰ লগতে জিডিপি অনুপাত উন্নত হোৱাত ভাৰতে বহনক্ষম বিকাশ কৰিবলৈ আৰু বিশ্বজুৰি প্ৰতিযোগিতা উন্নত কৰিবলৈয়ো সক্ষম হ'ব বুলিও কোৱা হৈছে এই প্ৰতিবেদনত।