ভাৰতৰ বছৰি খাদ্যশস্য উৎপাদন ৩৩০ মিলিয়ন টনঃ ৰপ্তানিত উপাৰ্জন ৫০ বিলিয়ন

ডিজিটেল ডেস্কঃ ভাৰতে এতিয়া বছৰি ৩৩০ নিযুত টন খাদ্য শস্য উৎপাদন কৰে। এনে বৃহৎ উৎপাদনৰ জৰিয়তে বিশ্বজুৰি খাদ্য বাণিজ্যত ভাৰতে গুৰুত্বপূৰ্ণ অৰিহণা যোগাইছে আৰু ৰপ্তানি উপাৰ্জনত ৫০ বিলিয়ন ডলাৰ উপাৰ্জন কৰিছে।

এই মন্তব্য কৰিছে, কেন্দ্ৰীয় কৃষি মন্ত্ৰী শিৱৰাজ সিং চৌহানে। শেহতীয়াকৈ ভিডিঅ' কনফাৰেন্সিংৰ জৰিয়তে ৰাষ্ট্ৰীয় ৰাজধানীত অনুষ্ঠিত হোৱা ‘Global Soils Conference 2024’  সম্বোধন কৰি কৃষি মন্ত্ৰীগৰাকীয়ে কয় যে, সকলোৰে বাবে বহনক্ষম আৰু লাভজনক হৈছে কৃষি। ভাৰত চৰকাৰ স্থিতিস্থাপক পৰিৱেশ তন্ত্ৰ আৰু খাদ্য সুৰক্ষা নিশ্চিত কৰা পদক্ষেপসমূহক সমৰ্থন কৰিবলৈ প্ৰতিশ্ৰুতিবদ্ধ।

চৌহানে লগতে উল্লেখ কৰে যে, ৰাসায়নিক সাৰৰ বৰ্ধিত ব্যৱহাৰ আৰু নিৰ্ভৰশীলতাৰ লগতে প্ৰাকৃতিক সম্পদৰ নিৰ্বিচাৰ শোষণ আৰু অস্থিৰ বতৰে মাটিত চাপ সৃষ্টি কৰিছে।

তেওঁ কয়, "আজি ভাৰতৰ ভূমিয়ে এক ডাঙৰ স্বাস্থ্য সংকটৰ সন্মুখীন হৈছে। বহু অধ্যয়ন অনুসৰি, আমাৰ মাটিৰ ৩০ শতাংশই নষ্ট হৈছে। মাটিৰ খহনীয়া, লৱণতা আৰু প্ৰদূষণে মাটিত অত্যাৱশ্যকীয় নাইট্ৰজেন আৰু মাইক্ৰ'নিউট্ৰিয়েণ্টৰ স্তৰ হ্ৰাস কৰিছে। মাটিত জৈৱিক কাৰ্বনৰ অভাৱৰ ফলত ইয়াৰ উৰ্বৰতা আৰু স্থিতিস্থাপকতা দুৰ্বল হৈ পৰিছে।"

ভাৰতৰ মাটিয়ে সন্মুখীন হোৱা প্ৰত্যাহ্বানবোৰে কেৱল খাদ্য শস্যৰ উৎপাদনকে প্ৰভাৱিত নকৰে। এই প্ৰত্যাহ্বানে আগন্তুক সময়ত ভাৰতৰ কৃষকসকলৰ বাবে জীৱিকা আৰু খাদ্য সংকটৰো সৃষ্টি কৰিব বুলিও তেওঁ দোহাৰে।

কেন্দ্ৰীয় কৃষি মন্ত্ৰীগৰাকীয়ে পুনৰ কয়, "চৰকাৰে মাটি সংৰক্ষণৰ বাবে বহু পদক্ষেপ হাতত লৈছে। ইয়াৰ উদ্দেশ্য হৈছে মাটিৰ উৰ্বৰতা বৃদ্ধি কৰা।"

প্ৰধানমন্ত্ৰী নৰেন্দ্ৰ মোডীৰ নেতৃত্বতে ২০১৫ চনত মাটি স্বাস্থ্য কাৰ্ড নিৰ্মাণ (Making Soil Health Card) আৰম্ভ কৰা হৈছিল। কৃষকসকলক ২২০ মিলিয়নত কৈয়ো অধিক কাৰ্ড প্ৰস্তুত কৰি বিতৰণ কৰা হৈছে।

'প্ৰধানমন্ত্ৰী কৃষি সিঞ্চাই যোজনা-প্ৰতি টোপাল অধিক শস্য' (‘Pradhan Mantri Krishi Sinchai Yojana-Per Drop More Crop,)ৰ অধীনত, চৰকাৰে পানীৰ ন্যায় সঙ্গত ব্যৱহাৰ, অপচয় হ্ৰাস আৰু সৰ্বাধিক পুষ্টিৰ অৱশিষ্ট হ্ৰাস কৰাৰ ওপৰত গুৰুত্ব আৰোপ কৰিছে।

মন্ত্ৰীগৰাকীয়ে লগতে কয়, "মাটিৰ উৰ্বৰতা বজাই ৰাখিবলৈ, একত্ৰিত পুষ্টি আৰু পানী ব্যৱস্থাপনা পদ্ধতি গ্ৰহণ কৰিব লাগিব। আমি বিভিন্ন পদ্ধতি যেনে ক্ষুদ্ৰ জলসিঞ্চন, শস্য বৈচিত্ৰ্যকৰণ, কৃষি-বনাঞ্চল আদিৰ জৰিয়তে মাটিৰ স্বাস্থ্য উন্নত কৰা, মাটি খহনীয়া আৰু পানী সংৰক্ষণ ক্ষমতা হ্ৰাস কৰাৰ বাবে সকলো ধৰণৰ ব্যৱস্থা গ্ৰহণ কৰা উচিত।"

"আমি শীঘ্ৰেই 'আধুনিক কৃষি চৌপাল' (Modern Agriculture Chaupal) আৰম্ভ কৰিবলৈ ওলাইছো। য'ত বিজ্ঞানীসকলে কৃষকসকলৰ সৈতে নিৰন্তৰ আলোচনা কৰিব আৰু তথ্য প্ৰদান কৰিব।

ইয়াৰ জৰিয়তে এই সমস্যাবোৰো সমাধান কৰা হ’ব। ইয়াৰ উপৰিও, ব্যক্তিগত আৰু বেচৰকাৰী সংগঠনৰ নেতৃত্বত সম্প্ৰসাৰণ সেৱাই কৃষকসকলৰ বাবে উন্নত প্ৰযুক্তি কঢ়িয়াই আনিছে আৰু কৃষকসকলে এতিয়া ইয়াৰ সুবিধা লৈছে।" চৌহানে কয় এইদৰে।