ডিজিটেল সংবাদ,জামুগুৰিহাট : জামুগুৰিহাটৰ উত্তৰাঞ্চলৰ বৰদিকৰাই নদীৰ পাৰৰ বালিচাপৰি অঞ্চলৰ ৪০ বিঘাৰো অধিক মাটিত কৃষিকৰ্মৰ জৰিয়তে স্বাৱলম্বিতাৰ নিদৰ্শন দাঙি ধৰিছে এজন যুৱকে। যিসময়ত একাংশ নিৱনুৱা যুৱকে পৰিয়ালৰ ভৰণ-পোষণৰ তাগিদাত বহিঃৰাজ্যত গৈ সামান্য কেইটামান টকাৰ বিনিময়ত কোম্পানীৰ লগতে বিভিন্ন হোটেল ৰেষ্টুৰেণ্টত চিকিউৰিটি গাৰ্ডৰ কাম কৰিব লগা হৈছে তেনে সময়তে জামুগুৰিৰ যুৱকজনে দেখুৱাইছে আদৰ্শৰ বাট ৷
জামুগুৰিহাটৰ যুৱক মদন বস্নেতে ঘৰতে থাকি নিজৰেই কৃষি ভূমিত কৃষি কৰ্ম কৰি উপাৰ্জন কৰা ধনেৰে পৰিয়াল ভৰণ-পোষণ দিবলৈ সক্ষম হৈছে ৷ যুৱ কৃষক মদন বস্নেতে বিগত ৫ বছৰ ধৰি বেঙেনা,জলকীয়া,তৰমুজ আৰু তিয়ঁহকে ধৰি বিভিন্ন খেতি কৰি বছৰত প্ৰায় ২ লক্ষাধিক টকা উপাৰ্জন কৰিছে ৷
যুৱকজনে নিজৰ লগতে ওচৰৰ ৭ গৰাকী যুৱকক কৃষি কৰ্মত জড়িত কৰি তেঁওলোককো কৰ্মত নিয়োজিত কৰিছে। যাৰ বাবে এই ৭টি পৰিয়ালত বিৰিঙি উঠিছে আশাৰ ৰেঙণি।
