ইউ এছ টি এমৰ প্ৰেক্ষাগৃহত বৰ্ণাঢ্য অনুষ্ঠান : পি এ চাংমা আন্তৰ্জাতিক চিকিৎসা মহাবিদ্যালয়লৈ এন এম চিৰ স্বীকৃতি

ডিজিটেল ডেস্ক : শনিবাৰে এক গাম্ভীৰ্যপূৰ্ণ পৰিৱেশৰ মাজত ইউ এছ টি এমৰ প্ৰেক্ষাগৃহত এক বৰ্ণাঢ্য অনুষ্ঠানৰ আয়োজন কৰা হয়। এই অনুষ্ঠানতে পি এ চাংমা আন্তৰ্জাতিক চিকিৎসা মহাবিদ্যালয়লৈ ৰাষ্ট্ৰীয় স্বাস্থ্য আয়োগ চমুকৈ এন এম চিৰ স্বীকৃতি প্ৰদান কৰা হয়।

চিকিৎসা মহাবিদ্যালয়খনলৈ এই স্বীকৃতি প্ৰদানৰ পাছতে উৎফুল্লিত হৈ পৰে চিকিৎসা মহাবিদ্যালয়খনৰে জড়িতসকলৰ লগতে ইউ এছ টি এম কৰ্তৃপক্ষ। পি এ চাংমা আন্তৰ্জাতিক চিকিৎসা মহাবিদ্যালয় হৈছে ইউ এছ টি এমৰে অধীনস্থ এখন চিকিৎসা মহাবিদ্যালয়।

এই স্বীকৃতি লাভৰ পাছত অৰ্থাৎ চলিত বৰ্ষৰ পৰাই আৰম্ভ হ’ব এম বি বি এছ পাঠ্যক্ৰম। এই পাঠ্যক্ৰমত এতিয়ালৈকে ১৫০ গৰাকী শিক্ষাৰ্থীয়ে নামভৰ্তি কৰা বুলি জানিবলৈ দিয়ে।  

উল্লেখযোগ্য যে এই অনুষ্ঠানতে সাদিন- প্ৰতিদিন গোষ্ঠীয়ে নতুন দিল্লীত আয়োজন কৰা দ্যা- কনক্লেভ ২০২৪ক প্ৰশংসাৰে ওপচাই শিক্ষানুষ্ঠানখনৰ কৰ্তৃপক্ষই। উক্ত অনুষ্ঠানত উপস্থিত থকা প্ৰতিদিন গোষ্ঠীৰ সঞ্চালক ঋষি বৰুৱাকো ধন্যবাদ জনোৱাৰ লগতে উচ্চ প্ৰশংসা কৰে ইউ এছ টি এমৰ প্ৰতিষ্ঠাপক আচাৰ্য ড০ মহবুল হকে।

আজিৰ এই অনুষ্ঠানত ভাষণ প্ৰদান কৰি মেঘালয়ৰ মুখ্যমন্ত্ৰী ক’নৰাড চাংমাই কয় যে ইউ এছ টি এম এখন সফল শিক্ষানুষ্ঠান। উন্নয়নৰ স্বাৰ্থতেই শিক্ষানুষ্ঠানখনক সকলো ধৰণৰ সহায়- সহযোগিতা আগবঢ়োৱাৰ প্ৰতিশ্ৰুতি দিয়ে মুখ্যমন্ত্ৰীগৰাকীয়ে।

এই বিশেষ অনুষ্ঠানটিত মূল কাৰ্যসূচীৰ উপৰি সাংস্কৃতিক কাৰ্যসূচীও পৰিৱেশন কৰা হয়। বিভিন্ন কৃষ্টিৰ সম্ভাৰেৰে নৃত্য পৰিৱেশন কৰে কুশীলৱসকলে।

আজিৰ এই গাম্ভীৰ্যপূৰ্ণ অনুষ্ঠানটিত মেঘালয়ৰ মুখ্যমন্ত্ৰী ক’নৰাড চাংমা, পি এ চাংমাৰ সহধৰ্মিনী ড০ সুৰদিনী কে চাংমা, মন্ত্ৰী ডা০ এ আমপিৰিং লিংটো, আবু তাহেৰ মণ্ডল, ডা০ বি ভাস্কৰ ৰাও, প্ৰতিদিন গোষ্ঠীৰ সঞ্চালক ঋষি বৰুৱা, জ্যেষ্ঠ সাংবাদিক অদীপ কুমাৰ ফুকন, প্ৰশান্ত ৰাজগুৰুৰ লগতে ভালেকেইগৰাকী ব্যক্তি উপস্থিত থাকে।

Also Read: বৈষ্ণৱ পণ্ডিত প্ৰয়াত ভূৱনেশ্বৰী মহন্তৰ বাসগৃহত বিধায়ক ৰূপক শৰ্মা