ডিজিটেল সংবাদ, উৰিয়ামঘাটঃ ’ভাৰতবৰ্ষৰ লৌহ মানৱখ্যাত চৰ্দাৰ বল্লভ ভাই পেটেলৰ জন্মদিন ৩১ অক্টোবৰ তাৰিখটো ভাৰত চৰকাৰে ৰাষ্ট্ৰীয় একতা দিৱসৰূপে পালন কৰি আহিছে ৷
দেশখনৰ বিভিন্ন দল-সংগঠনে বিভিন্ন কাৰ্যসূচীৰে এই দিৱস উদযাপন কৰে ৷ ধনশিৰি মহকুমাৰ চি চেক্টৰস্থিত ১৪২নং চি আৰ পি এফ বাহিনীয়েও তিনিদিনীয়াকৈ এই দিৱস পালন কৰিছে ৷ এই উপলক্ষে শনিবাৰে জনসাধাৰণৰ মাজত সজাগতা সৃষ্টি কৰাৰ উদ্দেশ্যে ছাত্ৰ-ছাত্ৰী সকলৰ মাজত এক চাইকেল ৰেলী উলিওৱা হয় ৷
ৰেংমা নদীৰ পকী দলঙৰ পৰা উৰিয়ামঘাট বজাৰৰ মাজেৰে চাইকেল ৰেলী কৰি উৰিয়ামঘাট ৰাজহুৱা খেলপথাৰত সামৰণি পৰা চাইকেল ৰেলীত স্থানীয় ৰেংমা সীমান্ত হাইস্কুল আৰু আচাম ৰাইফলচ্ বিদ্যালয়ৰ ছাত্ৰ-ছাত্ৰীসকলে অংশ গ্ৰহণ কৰে ৷
সামৰণি অনুষ্ঠানত বাহিনীটোৰ চি চেক্টৰৰ চেক্টৰ কামাণ্ডাৰ মুকেশ পি পি, ৰেংমা সীমান্ত হাইস্কুলৰ সহকাৰী শিক্ষকদ্বয় ক্ৰমে প্ৰতাপ গগৈ আৰু ছবিৰাম শইকীয়াই ৰাষ্ট্ৰীয় একতা দিৱসৰ তাৎপৰ্য সন্দৰ্ভত বক্তব্য দাঙি ধৰে ৷ ৰেলীত অংশ গ্ৰহণ কৰা ছাত্ৰ ছাত্ৰী সকলক চি আৰ পি এফ বাহিনীৰ তৰফৰ পৰা বহী আৰু কলম প্ৰদান কৰা হয় ৷
