‘নিৰ্বাচনত জয়ী হ’লেই পোনতে হাগ্ৰামা বাহিনীৰ দুৰ্নীতিৰ বিষয়ে তদন্ত কৰিবলৈ চৰকাৰক আহ্বান জনাম’

ডিজিটেল সংবাদ, শালবাৰীঃ'মই অন্যায়ৰ বিৰুদ্ধে যুঁজি আহিছোঁ,দুৰ্নীতিৰ বিৰুদ্ধে যুঁজি আহিছোঁ আৰু সদায় যুঁজি যাম৷এইবেলি নিৰ্বাচনত জয়ী হৈ সংসদত যোৱাৰ লগে লগে মই হাগ্ৰামা বাহিনীৰ দুৰ্নীতিৰ বিৰুদ্ধে তদন্ত চলাবলৈ ভাৰত চৰকাৰক আহ্বান জনাম৷" এই বক্তব্য এবছু সমৰ্থিত ইউপিপিএলৰ ৫ নং কোকৰাঝাৰ লোকসভা সমষ্টিৰ প্ৰাৰ্থী উৰ্খাও গৌৰা ব্ৰহ্মৰ৷

শুকুৰবাৰে বাক্সাৰ শালবাৰীত অনুষ্ঠিত এখন নিৰ্বাচনী সভাত প্ৰাৰ্থীগৰাকীয়ে কয়-"আমি সংঘৰ্ষমুক্ত অসম বিচাৰোঁ৷কিন্তু আজিৰ দিনতো বিটিএডিত বন্দুকৰ আন্দোলন চলিয়েই আছে৷" প্ৰাৰ্থী ব্ৰহ্মই সন্মিলিত জনগোষ্ঠীয় ঐক্যমঞ্চৰ প্ৰাৰ্থী সাংসদ নৱ কুমাৰ শৰণীয়াক সমালোচনা কৰিবলৈ গৈ কয়-" আজি নৱ কুমাৰ শৰণীয়াক পৰাজয়ী কৰিবৰ বাবে ৰাইজ ওলাই আহিছে৷নৱ কুমাৰ শৰণীয়াই কৰা বড়ো-অবড়োৰ ৰাজনীতিৰ দিন আজি উকলি গ'ল৷"

CABৰ বিৰুদ্ধে সংসদত মাত মাতিম বুলি বক্তব্য ৰখা ইউ জি ব্ৰহ্মই কয়-"ভাৰত চৰকাৰে বড়োলেণ্ড দিলে কোনেও ৰখাব নোৱাৰে আৰু নিদিলে যিমান আন্দোলন কৰিও লাভ নহ'ব৷" ছাইফুদ্দিন আহমেদৰ সভাপতিত্বত অনুষ্ঠিত আজিৰ সভাখনত ৰূস্তম আলী,হজৰত আলী,সৌৰভ দাস,বীনা গয়াৰী,মতিন আহমেদ আদিয়েও বক্তব্য ৰাখে৷