তিনিচুকীয়াৰ আদৰ্শ প্ৰাথমিক বিদ্যালয়ৰ ১২৬ সংখ্যক প্ৰতিষ্ঠা দিৱস উদযাপন...

ডিজিটেল সংবাদ, তিনিচুকীয়াঃ তিনিচুকীয়া জিলাৰ বুনিয়াদী শিক্ষাৰ অন্যতম আগশাৰীৰ তথা ঐতিহ্যমণ্ডিত চৰকাৰী শিক্ষানুষ্ঠান আদৰ্শ প্ৰাথমিক বিদ্যালয়ৰ ১২৬ সংখ্যক প্ৰতিষ্ঠা দিৱস সোমবাৰে উদযাপন কৰা হ’য় ৷ বিদ্যালয়খনৰ চাৰি গৰাকী প্ৰাক্তন ছাত্ৰৰ উপস্থিতিত বিশেষ কাৰ্যসূচীৰে উদযাপন কৰা হয় প্ৰতিষ্ঠা দিৱস ৷

অনুষ্ঠানৰ আৰম্ভণিতে বিদ্যালয়ৰ প্ৰাক্তন ছাত্ৰ তথা বিশিষ্ট ব্যৱসায়ী দেবব্ৰত দহোতীয়াই পতাকা উত্তোলন কৰি প্ৰতিষ্ঠা দিৱসৰ কাৰ্যসূচীৰ শুভাৰম্ভ কৰে ৷ বিদ্যালয়খনত গছপুলি ৰোপণ কৰে প্ৰাক্তন ছাত্ৰ তথা শদিয়া ইক’ কেম্পৰ স্বত্বাধিকাৰী প্ৰাঞ্জল প্ৰতীম দত্তই ৷ স্মৃতি তৰ্পণ অনুষ্ঠানৰ পাতনি মেলে প্ৰাক্তন ছাত্ৰ তথা সাংবাদিক চিন্ময় শৰ্মাই ৷

বিদ্যালয়খনৰ আন এজন প্ৰাক্তন ছাত্ৰ তথা অন্যতম সংগঠক ৰতনমণি চৌধুৰীয়ে আটাই কেইটা কাৰ্যসূচীতে সহযোগিতা আগবঢ়ায় ৷ ইয়াৰ পিছতে বিদ্যালয়ৰ প্ৰেক্ষাগৃহত প্ৰাক্তন ছাত্ৰকেইগৰাকীয়ে বন্তি প্ৰজ্বলন কৰে। বিদ্যালয়খনৰ প্ৰধান শিক্ষক হোমেন বৰুৱাই আঁত ধৰা অনুষ্ঠানত কণ কণ ছাত্ৰ-ছাত্ৰীসকলৰ লেখনিৰে সমৃদ্ধ 'কুঁহিপাত' শীৰ্ষক হাতেলিখা আলোচনীখনৰ ২০২২-২৩ বৰ্ষৰ তৃতীয় সংখ্যাটো উন্মোচন কৰে প্ৰাক্তন ছাত্ৰ চিন্ময় শৰ্মাই ৷

প্ৰতিষ্ঠা দিৱসৰ বিভিন্ন কাৰ্যসূচীত ছাত্ৰ-ছাত্ৰীসকলে নৃত্য, গীত, বক্তৃতা আদি পৰিৱেশন কৰি অনুষ্ঠানটো জীপাল কৰি তুলে ৷ আজিৰ কাৰ্যসূচীৰ লগত সংগতি ৰাখি বিদ্যালয়খনৰ প্ৰথম শ্ৰেণীৰ পৰা পঞ্চম শ্ৰেণীলৈ অনুষ্ঠিত বছৰেকীয়া পৰীক্ষাৰ ফলাফল ঘোষণা কৰা হ’য় ৷ লগতে প্ৰথম তিনিটা স্থান প্ৰাপ্তসকলক মানপত্ৰ আৰু মেডেল প্ৰদান কৰি শুভেচ্ছা জনোৱা হয় ৷ প্ৰতিষ্ঠা দিৱসৰ কাৰ্যসূচীত বিদ্যালয়ৰ ছাত্ৰ-ছাত্ৰী, শিক্ষক-শিক্ষয়িত্ৰী আৰু অভিভাৱকসকলো উপস্থিত থাকে ৷

Also Read: পৌৰকৰ বৃদ্ধিৰ প্ৰস্তাৱৰ বিৰুদ্ধে তিনিচুকীয়া জিলাত যুৱ-ছাত্ৰ পৰিষদৰ বিক্ষোভ...