ডিজিটেল সংবাদ,বালিপৰাঃ বালিপৰাৰ চিলনীত সদৌ অসম গোৰ্খা ছাত্ৰ সন্থাৰ চিলনী শাখা সমিতিৰ উদ্যোগত দ্বিতীয় বাৰ্ষিক পুষ্প ৰায় আৰু লোকমায়া গৌতম সোঁৱৰণী চলন্ত ট্ৰফি ও প্ৰাইজমানী ফুটবল খেল প্ৰতিযোগিতাৰ চূড়ান্ত খেলখন অনুষ্ঠিত হয়৷ দেওবাৰে বিয়লি ৩বজাৰ পৰা অনুষ্ঠিত ফাইনেল খেলখনত অংশগ্ৰহণ কৰে ধলাইবিল বৰমতা ফুটবল দল আৰু লবৰগাড়ী ফুটবল দলে।
ফুটবল খেলখনৰ লগত সংগতি ৰাখি গোৰ্খা ছাত্ৰ সন্থাৰ চিলনী শাখা সমিতিয়ে আয়োজন কৰা অনুষ্ঠানৰ জৰিয়তে সদ্য ঘোষিত উচ্চ আৰু উচ্চতৰ মাধ্যমিক চূড়ান্ত পৰীক্ষাত সুখ্যাতি অৰ্জ্জন কৰা কৃতী ছাত্ৰ-ছাত্ৰীৰ লগতে সাহিত্য একাডেমী বঁটা প্ৰাপক ছত্ৰমান চুব্বাক উষ্ম সম্বৰ্ধনা জ্ঞাপন কৰে।
অনুষ্ঠানিত বিশিষ্ট অতিথি হিচাবে অংশগ্ৰহণ কৰে শোণিতপুৰ জিলাৰ গোৰ্খা ছাত্ৰ সন্থাৰ সভাপতি দীপক চুব্বা,চিলনী আঞ্চলিকৰ সভাপতি চন্দ্ৰমনি চেত্ৰী, আঞ্চলিক পঞ্চায়তৰ প্ৰাক্তন সভাপতি দিনেশ্বৰ পাও ৰ লগতে কেইবাগৰাকী বিশিষ্ট ব্যক্তি। ইফালে ফুটবল খেল প্ৰতিযোগিতাৰ আকৰ্ষণীয় চূড়ান্ত খেলখনত লবৰগাড়ী ফুটবল দলে ট্ৰাইবেকৰত জয় লাভ কৰি বিজয়ীৰ খিতাপ দখল কৰে।
ধলাইবিল বৰমতা ফুটবল দলে দ্বিতীয় বিজয়ী তথা ৰানাৰ্ছআপ খিতাপ দখল কৰে ৷ স্বৰ্গীয় পূষ্প ৰায় আৰু লোকমায়া গৌতমৰ সোঁৱৰণত আয়োজিত ফুটবল খেল প্ৰতিযোগিতাখন সফল সমাপ্তিৰ ক্ষেত্ৰত ক্ৰীড়াপ্ৰেমী ৰাইজৰ পূৰ্ণ সহযোগিতাৰ বাবে খেল পৰিচালনা সমিতিৰ সভাপতি গোপাল আলে আৰু সম্পাদক দূৰ্গা গৌতমে ধন্যবাদ আৰু কৃতজ্ঞতা জ্ঞাপন কৰে ।
