বোকাখাতত এছ এফ আইৰ উদ্যোগত জনসুহৃদ চিদানন্দ শইকীয়াক লৈ বিশেষ চৰ্চা অনুষ্ঠান...

ডিজিটেল সংবাদ, বোকাখাতঃ গোলাঘাট-বোকাখাতৰ প্ৰগতিশীল ছাত্ৰ ৰাজনীতিৰ সুঁতিটোক পুনৰ উজ্জীৱিত কৰাৰ চেষ্টাৰে মঙ্গলবাৰে বোকাখাতৰ পুৱতি সাহিত্য সভা ভৱনত ভাৰতৰ ছাত্ৰ ফেডাৰেচনৰ অসমৰ উদ্যোগত অনুষ্ঠিত হয় "প্ৰগতিশীল ছাত্ৰ আন্দোলনত চিদানন্দ শইকীয়াৰ ভূমিকা আৰু সাম্প্ৰতিক গোলাঘাটৰ ছাত্ৰ ৰাজনীতি" শীৰ্ষক এক বিশেষ আলোচনা চক্ৰৰ।

ছােভিয়েট দেশ নেহৰু বঁটা প্ৰাপক, অসম ছাত্র ফেডাৰেছনৰ একালৰ সাধাৰণ সম্পাদক, কৃতী শিক্ষক , জনসুহৃদ চিদানন্দ শইকীয়াৰ প্ৰগতিশীল ছাত্ৰ আন্দোলনত  ভূমিকা কি আছিল তাক বিচাৰ কৰি চোৱাও সাম্প্ৰতিক ধৰ্মীয় ৰাজনীতি আৰু শাসনাধিষ্ট চৰকাৰখনৰ ফেচিষ্ট চৰিত্ৰৰ বাতাবৰণত নিশ্চয়কৈ প্ৰত্যাহ্বানমূলক।

তেনে প্ৰেক্ষাপটত কটন বিশ্ববিদ্যালয়ৰ শিক্ষাৰ্থী মেনকা পাটগিৰিয়ে সঞ্চালনা কৰা আলোচনা চক্ৰখনত বিশিষ্ট বক্তা হিচাপে উপস্থিত থাকে বিশিষ্ট চিন্তাবিদ, লেখক, দেৱৰাজ ৰয় মহাবিদ্যালয়,গোলাঘাটৰ ইংৰাজী বিভাগৰ অৱসৰপ্ৰাপ্ত মুৰব্বী অধ্যাপক হেম ফুকন, এছ এফ আইৰ ৰাজ্যিক সদস্য যুৱ বক্তা ৰাজদ্বীপ মহন্ত, নিমন্ত্ৰিত অতিথি হিচাপে উপস্থিত থাকে এছ এফ আইৰ ৰাজ্যিক সম্পাদক সংগীতা দাস, প্ৰয়াস অধ্যয়ন চক্ৰৰ হৈ সোনেশ্বৰ নৰহ, পল্লৱ হাজৰিকা, বোকাখাত জাতীয় বিদ্যালয়ৰ হৈ ইনজু আহমেদ, ৰিনুমনি শৰ্মা, চিদানন্দ শইকীয়াৰ পৰিয়ালৰ তৰফৰ পৰা তেখেতৰ জেষ্ঠ পুত্ৰ গোপিকানন্দ শইকীয়া, কবি-সাহিত্যিক নিজৰা বৰঠাকুৰ আৰু কেইবাগৰাকীও বিশিষ্ট ব্যক্তি আৰু ভালেসংখ্যক ছাত্ৰ-ছাত্ৰী।

আলোচনা চক্ৰখনত উপস্থিত হৈ বিশিষ্ট চিন্তাবিদ হেম ফুকনদেৱে তেওঁৰ ভাষণ প্ৰসংগত জনসুহৃদ চিদানন্দ শইকীয়াৰ প্ৰগতিশীল ছাত্ৰ আন্দোলনত  ভূমিকাৰ ওপৰত আলোকপাত কৰি তেখেতৰ ৰাজনৈতিক জীৱনৰ আৰম্ভণিৰ পৰা আধুনিক বোকাখাত নিৰ্মাণলৈকে বিস্তৃত পৰিক্ৰমাৰ এক মননশীল আলোচনা আগবঢ়াই। আনগৰাকী যুৱ বক্তা ৰাজদ্বীপ মহন্তই আলোচনা চক্ৰখনত অংশ লৈ শাসনাধিষ্ট বিজেপি চৰকাৰ খনৰ ফেচিষ্ট নীতি তথা বিৰামহীন উচ্ছেদক তীব্ৰ সমালোচনা কৰি কয় যে অসমীয়াৰ সভ্যতা সংস্কৃতিৰ ৰক্ষাৰ বাবে এই উচ্ছেদ অভিযান নহয়, পুঁজিপতিৰ স্বাৰ্থ ৰক্ষাৰ বাবেহে এই উচ্ছেদ অভিযান চলোৱা হৈছে।

 লগতে তেওঁ এনে প্ৰেক্ষাপটত এছ এফ আইৰ ভূমিকা কি হ'ব সেই সন্দৰ্ভতো এক তথ্য ভিত্তিক আলোচনা আগবঢ়াই। লগতে প্ৰান্তীয় অঞ্চলসমূহৰ অধ্যয়নৰ ক্ষেত্ৰত ছাত্ৰসমাজে ল'ব পৰা ভূমিকা সন্দৰ্ভতো আলোচনা আগবঢ়াই যুৱ বক্তা গৰাকীয়ে। আন এগৰাকী বক্তা এছ এফ আইৰ ৰাজ্যিক সম্পাদক সংগীতা দাসে তেওঁৰ ভাষণ প্ৰসংগত জনসূহৃদ চিদানন্দ শইকীয়াৰ ইতিমধ্যে প্ৰকাশিত আৰু অপ্ৰকাশিত ৰচনা সমূহৰ পুনৰ প্ৰকাশৰ ক্ষেত্ৰত এছ এফ আইয়ে পদক্ষেপ গ্ৰহণ কৰিব বুলি জানিবলৈ দি কয় যে অহা ১৯,২০,২১ চেপ্তেম্বৰত যোৰহাটত অনুষ্ঠিত হ'বলগীয়া এছ এফ আইৰ ৰাজ্যিক সন্মিলনত উক্ত ৰচনা সম্ভাৰ প্ৰকাশৰ ব্যৱস্থা গ্ৰহণ কৰা হ'ব আৰু এই ক্ষেত্ৰত সহযোগিতা আগবঢ়াব বোকাখাতৰ প্ৰয়াস অধ্যয়ন চক্ৰই।

মঙলবাৰৰ আলোচনা চক্ৰখনৰ প্ৰাকমূহূৰ্তত এছ এফ আইৰ পতাকা উত্তোলন কৰে এছ এফ আইৰ ৰাজ্যিক সম্পাদক সংগীতা দাসে আৰু স্মৃতি তৰ্পণ কৰে গোপিকানন্দ শইকীয়াই। আলোচনা চক্ৰখনত উপস্থিত বিশিষ্ট ব্যক্তিসকলক সম্বৰ্ধনা জ্ঞাপন কৰে আলোক নৰহ, ইমন কল্যাণ আৰু অৰ্ণৱ নৰহে। এটি কবিতা আবৃত্তি আৰু গীতৰ অনুষ্ঠান পৰিৱেশন কৰে এছ এফ আইৰ গোলাঘাট আৰু বোকাখাতৰ সদস্যকলে।