ডিজিটেল সংবাদ,নলবাৰীঃ সততে বিতৰ্কৰ মাজত সোমাই পৰা নলবাৰী জিলাৰ পশ্চিম নলবাৰী ৰাজহ চক্ৰ বিষয়া অপৰ্ণা শৰ্মা এইবাৰ নিজ সন্থাৰে অধিকাংশ বিষয়ববীয়া তথা সদস্যৰ ৰোষৰ সম্মুখীন হ'বলগীয়া হৈছে । শেহতীয়াভাৱে আদালতৰ এক গোচৰৰ ঘটনাক কেন্দ্ৰ কৰি তেওঁৰ সন্থাৰে শতাধিক এ এল আৰ এছ বিষয়াই আপত্তি দৰ্শাই লিখিতভাবে ৰাজহ আৰু দুৰ্যোগ প্ৰশমন বিভাগৰ প্ৰধান সচিবলৈ পত্ৰ প্ৰেৰণ কৰে ।
উল্লেখযোগ্য যে অলপতে ৰাজ্য চৰকাৰে একাংশ এ চি এছ বিষয়াক ঠায়ে ঠায়ে ৰাজহ চক্ৰ বিষয়া হিচাপে নিযুক্তি দিছে । ইয়াৰ পিছতে এ এল আৰ এছ সন্থাৰ সভাপতি তথা পশ্চিম নলবাৰী ৰাজহ চক্ৰ বিষয়া অৰ্পনা শৰ্মাই সন্থাৰ সভাপতি হিচাবে এ চি এছ বিষয়ক ভৱিষ্যতে যাতে চক্ৰ বিষয়া হিচাবে নিযুক্তি দিব নোৱাৰে তাৰ বাবে গুৱাহাটী উচ্চ ন্যায়ালয়ৰ দাৰস্থ হয় ।
গোচৰ নম্বৰ আই এ ( চিভিল ) / ১২৯৪ / ২০২৩ মৰ্মে ইতিমধ্যে মহামান্য আদালতত গোচৰ অব্যাহত আছে । এই ঘটনাৰ বাবে ৰাজ্য জুৰি এ চি এছ বিষয়া সকলৰ মাজত তীব্র প্ৰতিক্ৰিয়াৰ সৃষ্টি হয় ।
অকল এয়াই নহয় নিজৰ সন্থাৰে এ এল আৰ এছ বিষয়াসকলৰ অধিকাংশৰ মাজত বিৰূপ প্ৰতিক্ৰিয়াৰ সৃষ্টি হয় । আনকি সভাপতি অৰ্পনা শৰ্মাৰ এই কাৰ্যৰ বিৰুদ্ধে তেওঁৰ সন্থাৰ মুঠ সদস্য ১৬২ গৰাকীৰ ৮২ গৰাকীৰো অধিক সদস্যই ৰাজহ বিভাগৰ প্ৰধান সচিবক যোৱা ১৮ মেত অভিযোগ দাখিল কৰিছে ।
অভিযোগ পত্ৰত উল্লেখ অনুসৰি সভাপতি অৰ্পনা শৰ্মাই আদালতৰ দাৰস্থ হোৱা বিষয় সন্দৰ্ভত কোনো ধৰণৰ সভা অনুষ্ঠিত কৰি সিদ্ধান্ত লোৱা নাই । আনকি তেওঁলোকক মৌখিক ভাৱেও জনোৱা নাই । এনেকুৱা অগণতান্ত্ৰিক সিদ্ধান্ত লৈ আদালতৰ দাৰস্থ হোৱা বিষয় সন্দৰ্ভত ভৱিষ্যতে কি মোৰ লয় সেয়াও লক্ষণীয় হ'ব বুলি চৰ্চা চলিছে ।
