নগাঁৱত সত্ৰাধিকাৰ সমাসীন সভা আৰু বক্তৃতানুষ্ঠান

ডিজিটেল সংবাদ, নগাঁওঃ নগাঁও চহৰৰ জিলা পুথিভঁৰালত সতী ৰাধিকা মহিলা তীৰ্থ আৰু নগাঁও জিলা সত্ৰ মহাসভাৰ উদ্যোগত এদিনীয়া কাৰ্যসূচীৰে বক্তৃতানুষ্ঠান আৰু সত্ৰাধিকাৰ সমাসীন সভা ৷ ১৩ আগষ্ট দেওবাৰে দিনৰ ১১ বজাৰ পৰা এক গাম্ভীৰ্যপূৰ্ণ পৰিৱেশত শুভাৰম্ভ হয় এই অনুষ্ঠানটি৷

অনুষ্ঠানটি সঞ্চালনা কৰে ড° অৰুন্ধতী মহন্তই ৷ অনুষ্ঠানৰ পাতনিতে সত্ৰাধিকাৰসকলক মঞ্চলৈ আদৰণি জনোৱা হয় ৷ ইয়াৰ পিছতে মঞ্চ মুকলি কৰে সত্ৰাধিকাৰ নবীন গোস্বামীয়ে ৷ পৰৱৰ্তী পৰ্যায়ত ঘোষা পাঠ কৰাৰ লগতে মহাপুৰুষ মাধৱদেৱৰ বিৰচিত বৰগীত পৰিৱেশন কৰে চিন্ময় গোস্বামীয়ে ৷

উল্লেখযোগ্য যে, এই অনুষ্ঠানটিত "অসমৰ সত্রানুষ্ঠান : এটি তাত্ত্বিক সন্দর্শন" বিষয়ত মূল বক্তাৰ আসনখনি অলংকৃত কৰে অসমৰ প্রথিতযশা পণ্ডিত, গৱেষক ড° প্রদীপজ্যোতি মহন্তই। লগতে বক্তাৰূপে “অসমৰ সমাজ জীৱনৰ নিৰ্মাতা মহাপুৰুষ শংকৰদেৱ” বিষয়ত বক্তৃতা প্ৰদান কৰে নগাঁও মহাবিদ্যালয় (স্বতন্ত্র)ৰ অসমীয়া বিভাগৰ মুৰব্বী অধ্যাপিকা, সু-লেখিকা ড০ ৰূপাঞ্জলী দেৱীয়ে।

Also Read: লামডিং আৰক্ষীৰ ড্ৰাগছৰ বিৰোধী অভিযানঃ জব্দ হে'ৰইন, আটক...