ডিজিটেল সংবাদ, উৰিয়া গাঁও: নগাঁও জিলাৰ পুৰণিগুদাম আৰক্ষী চকীৰ অন্তৰ্গত ভেৰভেৰীৰ নিকটৱৰ্তী গোঁসাই গাঁৱত শুকুৰবাৰে দিন দুপৰতে এক চুৰিকাণ্ড ঘটনা সংঘটিত হয়। জানিব পৰা মতে শ্ৰী শ্ৰী মহামৃত্যুঞ্জয় মন্দিৰৰ সমীপৰ দ্বীপ গোস্বামীৰ ঘৰত কোনো নথকাৰ সুযোগ লৈ পিছফালৰ দৰ্জা ভাঙি চোৰে নগদ দহ হাজাৰ টকাসহ বহু মূল্যৱান সোণৰ আ-অলংকাৰ লুটপাত কৰি নিয়ে।
ঘটনা সন্দৰ্ভত ভুক্তভোগী পৰিয়ালৰ লোকে আৰক্ষীক অৱগত কৰাত পুৰণিগুদাম আৰক্ষী ঘটনাস্থলীত উপস্থিত হয়। চুৰিকাণ্ডৰ সন্দৰ্ভত আৰক্ষীয়ে প্ৰাৰম্ভিক তদন্ত কৰিছে যদিও বাতৰি লিখা পৰলৈকে আৰক্ষীয়ে কোনো লোককে আটক কৰিবলৈ সমৰ্থ হোৱা নাই।
বিশেষকৈ অতি জনবহুল অঞ্চলটোত দিন দুপৰতে চুৰিকাণ্ড সংঘটিত হোৱা বিষয়টোৱে স্থানীয় ৰাইজক চিন্তিত কৰি তুলিছে। উল্লেখযোগ্য যে,আৰক্ষীৰ নিষ্ক্ৰিয়তাৰ বাবেই পুৰণিগুদাম থানাৰ এলেকাসমূহত চোৰৰ ঘটনা সঘনাই বৃদ্ধি পোৱাৰ ৰাজহুৱা অভিযোগ উঠিছে।
