ডিজিটেল সংবাদ,কামপুৰঃ কৰ্মসূত্ৰে বহিঃৰাজ্যলৈ যাত্ৰা কৰা নগাঁৱৰ ২ নং কচুৱা গাঁৱৰ মজিবুৰ ৰহমানৰ কোনো সন্ধান লাভ কৰা নাই পৰিয়ালৰ লোকে।শুকুৰবাৰে কেৰেলা অভিমুখী ৰেলেৰে যাত্ৰা কৰিছিল লোকজনে। কিন্তু মধ্যপ্ৰদেশৰ এটা ৰেল ষ্টেচনৰ পৰা মজিবুৰৰ কোনো শুংসূত্ৰ লাভ কৰা নাই আত্মীয়ই।
পৰিয়ালৰ লোকে ফোন যোগে পোৱা খবৰ অনুসৰি,কেইজনমান যুৱকে মজিবুৰক মাৰধৰ কৰি ক'ৰবাত লৈ যায়। দুদিন ধৰি মজিবুৰৰ কোনো সন্ধান নোপোৱাত পৰিয়ালটোত হাহাকাৰ পৰিবেশৰ সৃষ্টি হয়। ৫ টা সন্তানৰ পিতৃ মজিবুৰ পৰিয়ালটোৰ একমাত্ৰ উপাৰ্জকাৰী।
কনমানি সন্তান কেইটাই মজিবুৰৰ সন্ধান উলিয়াই দিবলৈ কান্দি কান্দি মুখ্যমন্ত্ৰীক আহ্বান জনোৱা লগতে কোনো সদাশয় লোকে মজিবুৰৰ সম্ভেদ পালে 9387018635 নম্বৰত পৰিয়ালৰ সৈতে যোগাযোগ কৰিবলৈ আহ্বান জনায়।
