ছাগলী বধ কৰিব নোৱাৰিব বিক্ৰেতাই, খাদ্য অনুপযোগী মাংস বিক্ৰী কৰিলে ৫০ হাজাৰ টকা জৰিমণা…

ছাগলী বধ কৰিব নোৱাৰিব বিক্ৰেতাই, খাদ্য অনুপযোগী মাংস বিক্ৰী কৰিলে ৫০ হাজাৰ টকা জৰিমণা…

ডিজিটেল ডেস্ক, নগাঁও: বেমাৰী বা খাদ্য অনুপযোগী ছাগলী মাংস কোনো ব্যৱসায়ীয়ে নগাঁৱত বিক্ৰী কৰিছে নেকি ? যদি কৰিছে তেনে হ'লে নগাঁও জিলা প্ৰশাসনক অবগত কৰক ৷ খাদ্যৰ বাবে অনুপযোগী মাংস বিক্ৰী কৰা প্ৰমান হ'লে ব্যৱসায়ীয়ে ৫০ হাজাৰ টকা পৰ্যন্ত জৰিমনা ভৰিব লাগিব ৷ লগতে ব্যৱসায়ীৰ আজীৱন অনুজ্ঞাপত্ৰ বাতিল কৰা হ'ব ৷

উচ্চ ন্যায়ালয়ৰ নিৰ্দেশৰ ভিত্তিত ছাগলী মাংস ব্যৱসায়ীৰ ক্ষেত্ৰত কঠোৰ হৈছে ৰাজ্য চৰকাৰ ৷ ইতিমধ্যে ৰাজ্য চৰকাৰে উচ্চ ন্যায়ালয়ৰ নিৰ্দেশৰ ভিত্তিত কাৰ্যকৰী পদক্ষেপ গ্ৰহণ কৰিছে ৷ ইয়াৰ অংশ হিচাপে নগাঁও জিলা প্ৰশাসনে নগাঁৱৰ ৪৩ খন ছাগলী মাংস বিক্ৰী কৰা দোকানৰ ক্ষেত্ৰত কঠোৰ হৈছে ৷

ছাগলী মাংস বিক্ৰী কৰা দোকানৰ ক্ষেত্ৰতে নহয় ভেৰা মাংস বিক্ৰী কৰা দোকানৰ ক্ষেত্ৰটো কঠোৰতা অৱলম্বন কৰা দেখা গৈছে ৷ ছাগলী আৰু ভেৰা মাংস বিক্ৰেতাই এতিয়াৰ পৰা নিজে ছাগলী আৰু ভেৰা বধ কৰি মাংস বিক্ৰী কৰিব নোৱাৰিব ৷ পূৰ্বতে ছাগলী , ভেৰা নিষ্ঠুৰভাৱে বধ কৰি তাৰ মাংস বিক্ৰী কৰা হৈছিল ৷ সেই মাংস খাদ্যৰ বাবে উপয়ুক্ত হয় নে নহয় সেয়া পৰীক্ষা কৰা নহৈছিল ৷

উল্লেখ্য যে, মাংস বিক্ৰেতাই বহুসময়ত অধিক মুনাফাৰ বাবে ছাগলী বা ভেৰাৰ দেহত হৰমনৰ প্ৰয়োগ কৰিছিল ৷ ইয়াৰ বাহিৰেও বিভিন্ন ধৰনৰ বেজি প্ৰয়োগ কৰাই নহয় অধিক হাৰত নেফথেলিনৰ প্ৰয়োগ কৰাৰ অভিযোগ উত্থাপন হৈ আহিছে বিভিন্ন সময়ত ৷ হত্যাৰ পূৰ্বে হৰমন , বেজি , নেফথেলিন আদি প্ৰয়োগ কৰাৰ ফলত ছাগলী বা ভেৰাৰ মাত্ৰাধিক ওজন বৃদ্ধি পোৱাৰ লগতে কৃত্ৰিম ভাবে জুতি বৃদ্ধি কৰিবলৈ এনে কাম কৰা হৈছিল ৷ যাৰ বাবে মাংস বিক্ৰেতাৰ পৰা গ্ৰাহকে ক্ৰয় কৰা মাংস নিয়মীয়াকৈ গ্ৰহণ কৰা পিছত বিভিন্ন লোক অসুস্থ হৈ পৰিছিল ৷

সেয়ে ন্যায়ালয় মাংসৰ ক্ষেত্ৰত কঠোৰ হোৱাৰ পিছত ৰাজ্য চৰকাৰে ছাগলী আৰু ভেৰা মাংস বিক্ৰেতাক নিজে বধ কৰা কাৰ্যত হস্তক্ষেপ কৰে ৷ পৌৰ সভা , নগৰ সমিতিৰ অনুজ্ঞাপত্ৰ লৈ মাংস বিক্ৰী কৰা বিক্ৰেতাই নিজে ছাগলী বা ভেৰা বধ কৰিব নোৱাৰিব ৷ ইয়াৰ বিপৰিতে চৰকাৰী ভাবে নিদ্ধাৰিত প্ৰতিষ্ঠানতহে ছাগলী বা ভেৰা বধ কৰিব পাৰিব ৷

বৈজ্ঞানিক পদ্ধতিৰে যন্ত্ৰনাহীন ভাবে ছাগলী , ভেৰা বধ কৰি মাংস বিক্ৰেতাক গতাই দিব ৷ ইয়াৰ পিছতহে বিক্ৰেতাই মাংস বিক্ৰি কৰিব পাৰিব ৷ বধ কৰাৰ পূৰ্বে স্বীকৃত প্ৰাপ্ত প্ৰতিস্থানে চিকিৎসকৰ দ্বাৰা ছাগলী বা ভেৰাটোৰ মাংস খাদ্যৰ বাবে উপযোগী হয় নে নহয় তাক পৰীক্ষা কৰিব ৷ সেই পৰীক্ষাৰ পিছত খাদ্যৰ বাবে উপযোগী হ'লে চিকিৎসকে মোহৰ মাৰিব ৷ মোহৰ মৰাৰ পিছত ছাগলী বা ভেৰাটো স্বীকৃতি প্ৰাপ্ত প্ৰতিষ্ঠানে যন্ত্ৰনাহীন ভাবে বৈজ্ঞানিক পদ্ধতিৰে বধ কৰি স্বাস্থ্যকৰভাৱে মাংস বিক্ৰেতাৰ হাতত গতাই দিব ৷ চিকিৎসকৰ মোহৰ মৰা ছাগলী বা ভেৰাৰ মাংস বিক্ৰেতাই গ্ৰাহকক বিক্ৰী কৰিব পাৰিব ৷

মোহৰহীন মাংস বিক্ৰী কৰিলে ব্যৱসায়ীক প্ৰথম বাৰ ২৫ হাজাৰ বাৰ জৰিমনা বিহা হ'ব ৷ পুনৰাবৃত্তি কৰিলে ৫০ হাজাৰ টকা জৰিমনা বিহাৰ লগতে তেনে ব্যৱসায়ীৰ অনুজ্ঞাপত্ৰ বাতিল কৰাই আজীৱন মাংসৰ দোকান বন্ধ কৰি দিয়া হ'ব ৷

নগাঁও জিলাত চহৰ খনৰ মৰিকলঙত চৰকাৰী ভাবে ছাগলী বা ভেৰা বধৰ প্ৰতিষ্ঠানৰ অনুমতি প্ৰদান কৰা হৈছে ৷ স্বীকৃতি প্ৰাপ্ত মৰিকলঙৰ কাচাইখানত এই বেলি মাঘ বিহু , উৰুকাত ৩২৫ টা ছাগলী আৰু ভেৰাৰ স্বাস্থ্য পৰীক্ষা কৰা হৈছিল ৷ ইয়াৰে ৩৭ টা খাদ্যৰ বাব উপয়ুক্ত নহয় বুলি চিকিৎসকে ঘোষনা কৰিছিল ৷ ২৮৮ টাহে মৰিকলঙৰ কাচাইখানাত বধ কৰি মাংস বিক্ৰেতাক বজাৰত বিক্ৰী কৰিবলৈ অনুমতি দিয়া হৈছিল ৷

Related Stories

No stories found.
logo
Asomiya Pratidin
www.asomiyapratidin.in