ডিজিটেল সংবাদ, বিহালীঃ সম্প্ৰতি ৰাজ্যৰ আৰক্ষী বিভাগ বুলিলে অপৰাধ আৰু অপৰাধকাৰীটো দূৰৈৰে কথা নিৰাপৰাধী মানুহ ভয়ত পেঁপুৱা লাগে ৷ ঠিক তেনে সময়তে বিহালী আৰক্ষীৰ বিৰূদ্ধে উত্থাপন হৈছে গুৰুতৰ অভিযোগ ৷
অভিযোগ অনুসৰি যোৱা ৪ অক্টোবৰ নিশা প্ৰায় ৭ মান বজাত বিহালীৰ নিৱাসী ১৭ বছৰীয়া কিশোৰা এগৰাকীক একে গাঁৱৰে জেইনুল আহমেদ নামৰ এজন যুৱকে পলুৱাই লৈ যায় ৷ উচ্চতৰ মাধ্যমিকৰ দ্বাদশ শ্ৰেণীত অধ্যয়ণৰত ছাত্ৰী গৰাকীক পলুৱাই নিয়াৰ ঘটনাৰ সন্দৰ্ভত পৰিয়ালৰলোকে যোৱা ৬ অক্টোবৰত বিহালী আৰক্ষী থানাত এজাহাৰ দাখিল কৰি কিশোৰী গৰাকীক উদ্ধাৰ কৰি দিৱলৈ আবেদন জনায় ৷
এজাহাৰকাৰী আমিৰ হুছেইনে সদৰি কৰা মতে , বিহালী আৰক্ষী থানাত যুৱতী পলুৱাই নিয়া ঘটনাৰ সন্দৰ্ভত অভিযুক্ত হিচাপে জেইনুল আহমেদৰ খুড়াক মুক্তাৰ হুছেইনৰ নাম উল্লেখ কৰিছিল ৷
গুৰুত্বপূৰ্ণ বিষয়টো হ'ল, বিহালী আৰক্ষীয়ে পৰিয়ালৰলোকৰ পৰা এজাহাৰ পোৱাৰ পিছত বিহালী আৰক্ষীয়ে অভিযুক্ত জেইনুল আহমেদৰ অভিভাৱক খুড়াক মক্তাৰ হুছেইনক সোধ-পোছৰ বাবে আটক কৰি পৰৱৰ্তী সময়ত এৰি দিয়ে ৷ জানিব পৰা মতে , আৰক্ষীয়ে জেইনুল আহমেদৰ অভিভাৱক খুড়াক মুক্তাৰ হুছেইনক দুদিনৰ সময়সীমা বান্ধি জেইনুল আহমেদসহ কিশোৰী গৰাকীক আৰক্ষীক চমজাই দিবলৈ চৰ্ত বান্ধি দিছিল ৷ আনহাতে যোৱা ৯ অক্টোবৰত বিহালী আৰক্ষীয়ে আন তিনিজন লোকক সোধ-পোছৰ বাবে আটক কৰি কিশোৰীসহ জেইনুল আহমেদক আৰক্ষীক চমজাই দিবলৈ চৰ্ত বান্ধি এৰি দিয়ে৷
কিন্তু কিশোৰীগৰাকী নিৰুদ্দেশ হোৱাৰ ইমান দিন পাছতো বিচাৰি উলিয়াবলৈ সক্ষম হোৱা নাই আৰক্ষী।
অভিযোগ মতে , অভিযুক্ত জেইনুল আহমেদৰ অভিভাৱক খুড়াক মুক্তাৰ হুছেইনে কিছুমাহৰ পৰা আমিৰ হুছেইনক কিশোৰী গৰাকীক ভতিজাক জেইনুল আহমেদলৈ বিয়া দিবলৈ হেচাঁ প্ৰদান কৰি অহাৰ উপৰিও বিভিন্ন প্ৰলোভনমূলক কথা-বতৰাৰে প্ৰলোভিত কৰি আহিছিল ৷
কিন্তু আমিৰ হুছেইনে নিজ কন্যাৰ বয়স ১৭ হোৱাৰ অজুহাত দেখুওৱাই জেইনুল আহমেদলৈ বিয়া দিয়া নাছিল ৷ আমিৰ হুছেইনে কিশোৰীগৰাকীক মুক্তাৰ হুছেইনৰ ভতিজাক জেইনুল আহমেদলৈ বিয়া নিদিয়াৰ বাবেই চক্ৰান্তৰে পলুৱাই নিয়া বুলি অভিযোগ কৰিছে ৷
