মেৰাপানীত বাৰ্মিজ চুপাৰীসহ এখন বাহন জব্দ...

ডিজিটেল সংবাদ, মেৰাপানীঃ নিশা মেৰাপানীত বাৰ্মিজ চুপাৰীসহ এখন টাটা যোদ্ধা বাহন জব্দ। মেৰাপানী আৰক্ষীৰ অভিযানত জব্দ হৈছে বাৰ্মিজ চুপাৰী ভৰ্তি বাহনখন। অসাধু ব্যৱসায়ী চক্ৰই নাগালেণ্ডৰ পৰা গোপন পথেৰে মেৰাপানী হৈ ষোল্ল বস্তা অবৈধ চুপাৰী কঢ়িয়াই অনা AS01 PC 7004 নম্বৰৰ বাহনখন আৰক্ষীয়ে খেদি খেদি জব্দ কৰিবলৈ সক্ষম হয়।

মেৰাপানীৰ ইছলামপুৰ গাঁৱৰ পৰা জব্দ কৰা হৈছে এই চুপাৰীভৰ্তি বাহনখন। অৱশ্যে আন্ধাৰৰ সুযোগ লৈ বাহনখনৰ চালক আৰু সহযোগী পলায়ন কৰে। জব্দকৃত চুপাৰিখিনিৰ বজাৰমূল্য পাঁচ লক্ষাধিক টকা হ'ব বুলি অনুমান কৰা গৈছে।

উল্লেখযোগ্য যে, অবৈধ চুপাৰি সৰবৰাহৰ ক্ষেত্ৰত মেৰাপানী আৰক্ষী যথেষ্ঠ কঠোৰ হোৱাত চুপাৰি সৰবৰাহকাৰীয়ে সৰু সৰু বাহনেৰে এনেদৰে কৌশলেৰে সৰবৰাহৰ চেষ্টা চলাই থকাৰ মাজতে আৰক্ষীয়ে অভিযান চলাই আটক কৰে বাহনখন।