ডিজিটেল সংবাদ, নুমলীগড় : নুমলীগড় শোধনাগাৰৰ সামাজিক উন্নয়ন পুঁজিৰ প্ৰায় কোটি টকা লুণ্ঠনৰ জাল অনা-অসমীয়া ঠিকাদাৰৰ ৷ এই অভিযোগ মৰঙি সচেতন নাগৰিক মঞ্চৰ ৷ নুমলীগড় শোধনাগাৰৰ সমাজিক উন্নয়ন পুঁজিৰ প্ৰায় এককোটি টকা ব্যয় সাপেক্ষে স্বাস্থ্য কেন্দ্ৰখনৰ আন্তঃগাঁথনি উন্নয়ন আৰু মেৰামতিৰ কামৰ বাবে মুকলি কৰি দিছে পুঁজি ৷
কিন্তু একাংশ বিষয়া আৰু ঠিকাদাৰ আশিষ টোডীয়ে এই পুঁজি লুণ্ঠন চলোৱাৰ অভিযোগ উঠিছে ৷ শতবৰ্ষ গৰকা পুৰণি গৃহটোৰ পঁচা কাঠ সমূহ বদলি নকৰাকৈ টিং লগোৱা কাৰ্যত ৰাইজৰ চকু কপালত তুলিছে ৷ ইয়াৰ উপৰি নিম্নমানৰ কাম দেখিও চকু মুদা কুলিৰ ভাও দি ভাল কাম কৰা বুলি কেমেৰাৰ আগত গৰ্বৰে প্ৰকাশ কৰিছে বিতৰ্কিত ভাৰপ্ৰাপ্ত স্বাস্থ্য বিষয়াজনে ৷
ৰাইজৰ অভিযোগ স্বাস্থ্য বিষয়াজনে ঠিকাদাৰৰে মিলি লুণ্ঠন চলোৱাৰ ফন্দি পাতিছে ৷ আনহাতে যোৱা তিনিটা দশক পৰিচালনা সমিতি অবিহনে চলি আছে মৰঙি ক্ষুদ্ৰ প্ৰাথমিক স্বাস্থ্য কেন্দ্ৰ ৷ শীঘ্ৰেই গোলাঘাট স্বাস্থ্য বিভাগ তথা গোলাঘাট প্ৰশাসনক তদন্ত কৰি বিহিত ব্যবস্থা গ্ৰহণৰ দাবী জনাইছে ৰাইজে।
