ডিজিটেল সংবাদ,মথুৰাপুৰঃ দুদিনীয়া বৰ্ণাঢ্য কাৰ্যসূচীৰে অনুষ্ঠিত হোৱা মথুৰাপুৰ উচ্চতৰ মাধ্যমিক বিদ্যালয়ৰ মহাৰজত জয়ন্তী অনুষ্ঠানৰ মঙলবাৰে পুৱতি নিশা সফল সামৰণি পৰে । সমাৰোহৰ দ্বিতীয় দিনাৰ কাৰ্যসূচী অনুসৰি আজি পুৱা বিদ্যালয় চৌহদৰ পৰা উলিওৱা বাৰেৰহণীয়া সাংস্কৃতিক শোভাযাত্ৰাই বিভিন্নজনৰ মন মুহিবলৈ সক্ষম হয় ।
অসমৰ জনপ্ৰিয় কৌতুক অভিনেতা অৰুণ হাজৰিকাই উদ্বোধন কৰা সাংস্কৃতিক শোভাযাত্ৰাত কাষৰীয়া বিদ্যালয়সমূহৰ ছাত্ৰ-ছাত্ৰীসকলৰ উপৰি স্থানীয় ৰাইজে অংশগ্ৰহণ কৰি অসমৰ বিহু, ঝুমুৰ, জিকিৰ আদিৰ লগতে থলুৱা বিভিন্ন কৃষ্টি-সংস্কৃতিক প্ৰতীকি অৰ্থত সুন্দৰভাৱে উপস্থাপন কৰে।
বিয়লি উদযাপন সমিতিৰ সভাপতি আলিম আহমেদৰ সভাপতিত্বত বহা মুকলি সভাখন উদ্বোধন কৰে অসম মাধ্যমিক শিক্ষা সংসদৰ পৰীক্ষা নিয়ন্ত্ৰক নয়নজ্যোতি শৰ্মাই । মহাৰজত জয়ন্তী উপলক্ষে উদযাপন সমিতিয়ে প্ৰকাশ কৰি উলিওৱা 'মথুৰাপুৰ' নামৰ স্মৃতিগ্ৰন্থখন উন্মোচন কৰে গড়গাঁও মহাবিদ্যালয়ৰ অধ্যক্ষ ড° সব্যসাচী মহন্তই । সভাত শিৱসাগৰ আৰু চৰাইদেউ জিলাৰ বিদ্যালয় সমূহৰ পৰিদৰ্শক কমলজ্যোতি গগৈয়ে আমন্ত্ৰিত অতিথি ৰূপে উপস্থিত থাকে । নিশালৈ অনুষ্ঠিত হোৱা সাংস্কৃতিক সন্ধিয়া পাচতেই অনুষ্ঠানৰ সফল সমাপ্তি ঘটে
আৰু পঢ়ক : আজি এদিনীয়াৰ সিংহাসন দখলৰ যুঁজ
