ডিজিটেল সংবাদ,বিহপুৰীয়াঃ বিহপুৰীয়াৰ অন্যতম সামাজিক সাংস্কৃতিক অনুষ্ঠান ৰ’দালি সংঘৰ উদ্যোগত বিহপুৰীয়া বিহুতলীৰ সোণালী জয়ন্তী উদযাপন কৰা হয়। আজি উলিওৱা বাৰেৰহণীয়া সাংস্কৃতিক শোভাযাত্ৰাই বিহপুৰীয়াবাসীৰ মন মুহিবলৈ সক্ষম হয় ৷ জনপ্ৰিয় অভিনেতা নয়ন নিলীম আৰু ভ্ৰান্তি মেধিয়ে অংশগ্ৰহণ কৰা শোভাযাত্ৰাত বিভিন্ন জাতি জনগোষ্ঠীয় সাংস্কৃতিক দল সমূহে অংশগ্ৰহণ কৰি এক নান্দনিক পৰিৱেশৰ সৃষ্টি কৰে ৷
ঢোল পেঁপাৰ লগতে গায়ন - বায়নৰ পৰা আৰম্ভ কৰি ভাওনা,বিভিন্ন লোককৃষ্টিৰ সমাহাৰেৰে উলিওৱা শোভাযাত্ৰাই বিহপুৰীয়া নগৰৰ আকাশ বতাহ মুখৰিত কৰি তোলে৷ ২৩ এপ্ৰিলৰ পৰা ২৬ এপ্ৰিললৈকে বৰ্ণাঢ্য কাৰ্যসূচীৰে অনুষ্ঠিত কৰা বিহপুৰীয়া বিহুতলীৰ সোণালী জয়ন্তী উৎসৱ উদযাপনস্থলি সম্প্ৰতি ঢোলৰ গুমগুমনিত এক উখল-মাখল পৰিৱেশৰ সৃষ্টি হৈছে ৷ ইপিনে শোভাযাত্ৰাত অংশগ্ৰহণ কৰা নয়ন নীলিম আৰু ভ্ৰান্তি মেধিৰ লগত বিহু গাই এপাক নাচিলে বিহপুৰীয়াৰ প্ৰাক্তন বিধায়ক তথা উদযাপন সমিতিৰ সভাপতি দেবানন্দ হাজৰিকাই ৷
