- ডা: হেমন্ত কুমাৰ গোস্বামী
আজি বাগদেৱী বীণাপাণিৰ দিন ,
সৰস্বতী বন্দনাৰ দিন ,
আজি ধূপ-ধূনা জ্বলাই কিতাপ-বহীক সেৱা কৰাৰ দিন ,
মন-মগজুক জিৰণি দিয়া দিন ।
আজি মেখেলা-চাদৰ পিন্ধিবলৈ শিকাৰ দিন ,
জাক-জাক গাভৰু জুম বান্ধি ফুৰাৰ দিন ,
আজি ফটো উঠা দিন , প্ৰাণখুলি কথা পতাৰ দিন , হঁহাৰ দিন ,
আজি হিয়া দিয়া-নিয়াৰ দিন ।
কিছুমান বিদ্যামন্দিৰত সংগীতানুষ্ঠানৰ দিন ,
কিছুমানত আজি কবি-সন্মিলন আৰু আলাপ-আলোচনাৰ দিন ,
মহাবিদ্যালয়ৰ বাৰাণ্ডাবোৰ প্ৰাচীৰ-পত্ৰিকাৰে সুশোভিত হোৱাৰ দিন।
এদিনৰ বাবে আজি সৰস্বতী মূৰ্তিত সেৱা কৰাৰ দিন ,
নপঢ়াকৈয়ে পৰীক্ষাত পাচ কৰাই দিবলৈ আশীৰ্বাদ বিচৰাৰ দিন ,
বিদ্যামন্দিৰৰ চোতালত বহি খিচিৰি খোৱাৰ দিন ।
আজি সৌন্দৰ্য প্ৰতিযোগিতাৰ দিন ,
ধুনীয়া ছোৱালী বিচাৰি কেমেৰাবোৰ ঘূৰি ফুৰাৰ দিন ,
আজি সোনকালে ওলাই গৈ পলমকৈ ঘৰলৈ ওভতাৰ দিন ,
আজি অভিভাৱকৰ অতিশয় চিন্তাৰ দিন
আজি হস্পিটালবোৰত অতিশয় ব্যস্ততাৰ দিন ।
তথাপি আজি আনন্দৰ দিন ,
সকলোতকৈ ধুনীয়া , সকলোতকৈ শান্ত
দেৱী সৰস্বতীৰ পূজাৰ দিন ,
আজি সবাতোকৈ শুভদিন ।।
আৰু পঢ়ক : কালান্তৰৰ কবিতা
