পানী ‘বটলিং’ কাৰখানাৰ বিৰুদ্ধে কামৰূপ মহানগৰ প্ৰশাসনৰ অভিযানঃ বন্ধ কৰিলে কেইবাটাও কাৰখানা…

ডিজিটেল সংবাদ গুৱাহাটীঃ কামৰূপ মহানগৰ জিলাত অবৈধ অৰু অস্বাস্থ্যসন্মত পানী বটলিং কাৰখানাসমূহ সমুলঞ্চে উৎখাত কৰাৰ লক্ষ্যেৰে উপায়ুক্ত পল্লৱ গোপাল ঝাই গঠন কৰি দিয়া টাস্ক ফ'ৰ্চে জিলাখনৰ বিভন্ন প্ৰান্তত জোৰদাৰ অভিযান আৰম্ভ কৰিছে। কেতবোৰ ৰাজহুৱা অভিযোগৰ পৰিপ্ৰেক্ষিতত জনসাধাৰণৰ জীৱন আৰু স্বাস্থ্য ৰক্ষাৰ বাবে জিলা প্ৰশাসনে চক্ৰ বিষয়া, দণ্ডাধীশ, আৰক্ষী খাদ্য সুৰক্ষা বিষয়া তথা গুৱাহাটী পৌৰ নিগমৰ বিষয়াৰ দ্বাৰা গঠন কৰা 'টাস্ক ফৰ্চে' ইতিমধ্যে জিলাখনৰ কেবাটাও অনুমতিবিহীন, অস্বাস্থ্যসন্মত পানী বটলিং কাৰখানা তাৎক্ষণিকভাৱে বন্ধ কৰি দিয়ে। পেচিফিক ৱাটাৰ, চিউৰ লাইফ, ট্ৰেপিষ্ট-১, ৰাইনো একুৱা, জী ড্ৰপচ্, হেল্ল' ৱাটাৰ, হেভেন ডিউ, পিওৰ একুৱা, পিয়াছা ড্ৰপ আৰু লগতে কেবাটাও নামহীন পানী বটলিং কাৰখানা বন্ধ কৰি দিয়াৰ পিছত মন্তব্য প্ৰকাশ কৰি উপায়ুক্ত পল্লৱ গোপাল ঝায়ে কয় যে, বৃহত্তৰ স্বাৰ্থৰ বাবে গ্ৰহণ কৰা এই ব্যৱস্থা জিলাখনৰ পৰা এনে অসাধু চক্ৰ সম্পূৰ্ণভাৱে উৎখাত নকৰা পৰ্যন্ত চলি থাকিব।