ডিজিটেল ডেস্কঃ বিজয় উৎসৱৰ বাবে ভূপেন বৰাই যোৱাকালিয়ে আনি থোৱা ফটকাসমূহ মনে মনে শৌচাগাৰৰ টেংকীত পেলাই দিছে। নাচিবলৈ অনা বিহুদল দুটিয়ে মাননী বিচাৰি ৰাজীৱ ভৱনত হাহাকাৰ লগাইছে- এই মন্তব্য মন্ত্ৰী জয়ন্ত মল্লবৰুৱাৰ।
সামাজিক মাধ্যমত এনে ধৰণৰ পোষ্ট কৰি কংগ্ৰেছক ঠাট্টা-মস্কৰা কৰিছে শাসকীয় দলৰ মন্ত্ৰীগৰাকীয়ে। প্ৰদেশ কংগ্ৰেছৰ সভাপতি গৰাকীৰ এই কাণ্ডক অস্বাভাৱিক উদযাপনৰ ৰণনীতি বুলি কটাক্ষ কৰে মন্ত্ৰীগৰাকীয়ে।
বৰ্তমান চলি থকা ভোট গণনাত ৩ খন ৰাজ্যতে বিজেপি আগবাঢ়ি আছে। ছত্তিশগড়ত বিজেপিয়ে শাসনাধিষ্ঠিত কংগ্ৰেছতকৈ আগবাঢ়ি যোৱা দেখা গৈছে। সংখ্যাগৰিষ্ঠতাৰ ঘৰ অতিক্ৰম কৰিছে বিজেপিয়ে। আনহাতে কংগ্ৰেছৰ হাতত থকা এতিয়া ৰাজস্থানো এতিয়া বিজেপিৰ দখললৈ যোৱাৰ দিশত । ইতিমধ্যে ৰাজ্যখনৰ মুখ্যমন্ত্ৰী অশোক গেহলোটে পদত্যাগ কৰাৰ সিদ্ধান্ত লৈছে।
লগতে সকলোৱে মিজোৰাম নিৰ্বাচনৰ ফলাফলৰ বাবে আগ্ৰহেৰে অপেক্ষা কৰি আছে। খ্ৰীষ্টান সংখ্যাগৰিষ্ঠ ৰাজ্যখনত দেওবাৰে পালন কৰা প্ৰাৰ্থনাৰ প্ৰতি সন্মান জনাই ৪ ডিচেম্বৰত ভোট গণনাৰ দিন ধাৰ্য কৰা হৈছে। কাইলৈ ওলাই পৰিব মিজোৰাম বিধানসভা নিৰ্বাচনৰ ফলাফল।
