ডিজিটেল সংবাদ, জামুগুৰিহাটঃ জামুগুৰিহাটৰ ঐতিহ্যমণ্ডিত পাতলৰচুক গাঁৱত দুদিনীয়া কাৰ্যসুচীৰে অনুষ্ঠিত হৈছে ২৬৮ সংখ্যক শ্ৰীকৃষ্ণজন্মাষ্টমী আৰু বোকাখেচা ভাওনা ৷ বুধবাৰে পুৱাৰে পৰা বিভিন্ন কাৰ্যসুচী ৰূপায়ন কৰাৰ অন্তত সন্ধ্যা পাতলৰচুক গাওঁৰ নামঘৰত উপস্থিত হয়হি চতিয়া সমষ্টিৰ বিধায়ক পদ্ম হাজৰিকা ৷
বিধায়ক গৰাকীয়ে ভক্তপ্ৰাণ ৰাইজক উদ্দেশ্যি কয়-অসমীয়া সমাজখনৰ প্ৰাণ প্ৰতিষ্ঠাতা মহাপুৰুষ জনাৰ সৃষ্টি ৰাজি আমি যুগমীয়া কৰি ৰাখিব লাগিব ৷ ভাওনা সংস্কৃতিয়ে অসমীয়া সমাজখনক শক্তিশালী আৰু সুদৃঢ় কৰি ৰাখিছে ৷ সহস্ৰাধিক ভক্তপ্ৰাণ ৰাইজৰ পদধুলাই বৈকুণ্ঠ নগৰীত পৰিণত কৰা পাতলৰচুক গাঁৱৰ নামঘৰৰ থাপনাত আঠু লৈ শলিতাও আগবঢ়ায় বিধায়ক গৰাকীয়ে ৷
সন্ধিয়া গাওঁখনৰ চৌ দিশ তথা সমগ্ৰ নামঘৰ প্ৰাঙ্গণ ধূপ-ধূনা চাকিৰ পোহৰৰে আলোকিত কৰি এক নান্দনিক পৰিৱেশ সৃষ্টি কৰে গাওঁবাসীয়ে ৷ আজি বিয়লি এই ভাওনাৰ মূল আকৰ্ষণ বোকাখেছা ভাওনা অনুষ্ঠিত কৰা হব বুলি জানিবলৈ দিয়ে উদ্যোক্তা সকলে ৷
