ডিজিটেল সংবাদ, গোলাঘাটঃ চ’ত, বহাগত বৰদৈচিলা মাকৰ ঘৰলৈ যাই বুলি এক প্ৰবাদ অসমীয়া সমাজত অতীজৰে পৰা প্ৰচলিত । এনে সময়ত অহা বতাহ, ধুমুহাই বিভিন্ন সময়ত মানুহৰ বাসস্থানৰ উপৰিও পশু, পক্ষী সকলোৰে বাসস্থান ভাঙি থৈ যায় । নাইবা নষ্ট কৰি পেলায় আশ্ৰয়স্থল । যাৰ ফলত ঠিকনাবিহীন হৈ পৰে পশু-পক্ষী ।
এইদৰে শেহতীয়াকৈ বতাহত ঠিকনা হেৰুৱাই জনাঞ্চললৈ অহা দুষ্প্ৰাপ্য ধনেশ পক্ষী উদ্ধাৰ কৰে এজন যুৱকে । প্ৰৱল ধুমুহাৰ ফলত ধনেশ পক্ষীটি আহি পৰেহি ব্ৰহ্মপুত্ৰ অঞ্চলৰ শ'লমাৰিত।
মনোজ হাজৰিকা নামৰ যুৱকজনে প্ৰত্যক্ষ কৰি ব্যৱস্থা কৰে চিকিৎসাৰ । যথেষ্ট দুৰ্বল হৈ ধনেশ পক্ষীটোক খাদ্য যোগান ধৰাৰ লগতে চিকিৎসাৰ ব্যৱস্থা কৰি চমজাই দিয়ে বনবিভাগৰ হাতত । দুষ্প্ৰাপ্য পক্ষীটোক উদ্ধাৰ কৰিবলৈ পাই আনন্দিত যুৱকজন । যুৱকজনৰ এই প্ৰকৃতিপ্ৰেমক সকলোৱে একেমুখে শলাগ লৈছে ।
