ডিজিটেল সংবাদ উৰিয়ামঘাটঃ উৰিয়ামঘাটত আজি এক ভয়ংকৰ পথ দুৰ্ঘটনা সংঘটিত হয়। এই দুৰ্ঘটনাত চাৰিজনকৈ যুৱক অতি গুৰুতৰভাৱে আহত হৈছে। আহত যুৱক কেইজনক অতি সংকটজনকভাৱে হাস্পতাললৈ প্ৰেৰণ কৰা হৈছে।
জানিব পৰা মতে উৰিয়ামঘাটৰ হাতিডুবীত দুখনকৈ তীব্ৰবেগী বাইকৰ মাজত মুখামুখী সংঘৰ্ষৰ ফলতে এই দুৰ্ঘটনা সংঘটিত হয়। দুৰ্ঘটনাত আহত যুৱক কেইজন ক্ৰমে উৰিয়ামঘাট পানবাৰীৰ ৰমেশ গঁড়, ৰাণীপুখুৰীৰ দীপু সোণোৱাল, চুকীয়াপথাৰৰ হেমন্ত নেওগ আৰু জয়াপথাৰৰ ৰুবুল শইকীয়া।
দুৰ্ঘটনাগ্ৰস্ত বাইক দুখনৰ নম্বৰ ক্ৰমে AS 05 V 7780 আৰু AS05 T 2170। দুৰ্ঘটনা সংঘটিত হোৱাৰ পাছতেই স্থানীয়ে ৰাইজৰ সহযোগত আহত আটাইকে উৰিয়ামঘাট আৰক্ষীয়ে প্ৰথমে উৰিয়ামঘাট আদৰ্শ চিকিৎসালয়ত ভৰ্তি কৰায়। কিন্তু চাৰিওজনৰে অৱস্থা সংকটজনক হোৱাত তেওঁলোকক উন্নত চিকিৎসাৰ বাবে গোলাঘাটলৈ প্ৰেৰণ কৰা হৈছে।
