ডিজিটেল সংবাদ, কাজিৰঙাঃ কাজিৰঙা ৰাষ্ট্ৰীয় উদ্যানৰ বুঢ়াপাহাৰ বনাঞ্চল এলেকাধীন ৩৭ নং ৰাষ্ট্ৰীয় পথৰ কাষত বন্যজন্তুৰ বিচৰণ সচৰাচৰ দেখিবলৈ পোৱা মনোৰম দৃশ্য ৷
কিন্তু বন্যজন্তুৰ মাজত জাকেজাকে পশুধনৰ অবাধ বিচৰণৰ দৃশ্যই প্ৰতিক্ৰিয়াৰ সৃষ্টি কৰিছে সচেতন মহলত ৷ কাৰণ ৰাজ্যত লাম্পি ৰোগৰ সংক্ৰমনে গোপালকৰ মাজত আতংকৰ সৃষ্টি কৰিছে ৷
চৰকাৰেও এই ৰোগ নিৰাময়ৰ বাবে বিশেষ প্ৰদক্ষেপ গ্ৰহন কৰিব লগিয়া হৈছে ৷ বিশেষ ভাৱে গোধনৰ শৰীৰত দেখা দিয়া লাম্পি ৰোগৰ সংক্ৰমন চিন্তাৰ কাৰণ হৈ পৰিছে পশু বিশেষজ্ঞৰ মাজত ৷
বিশেষজ্ঞৰ সূত্ৰৰ পৰা জানিব পৰা মতে এই ৰোগ হৰিণা বা ম’হলৈ সহজে বিয়পাৰ সম্ভাৱনা থাকে ৷
এনে পৰিস্থিতিত জাকে জাকে গৰু ৰাষ্ট্ৰীয় উদ্যানৰ বন্যজন্তুৰ লগত বিচৰণ কৰি থকাৰ পাছতো বুঢ়াপাহাৰ বনাঞ্চলৰ বনাঞ্চলিক বিষয়াৰ নিৰৱ ভূমিকাই সচকিত কৰিছে সচেতন মহলক ৷
সচেতন মহলৰ মতে এনে এটা সংবেদনশীল বিষয়ত গোপালকৰ মাজত উদ্যান কৰ্তৃপক্ষই সজাগতাৰ সৃষ্টি কৰি ৰাষ্ট্ৰীয় উদ্যানত গোধন প্ৰৱেশ বাৰণ কৰাৰ প্ৰয়োজন ৷
তদুপৰি বন্যজন্তু দাঁতি কাষৰীয়া জনাঞ্চলত বিচৰণ কৰাৰ ক্ষেত্ৰতো বৰ্তমান সময়ত বন বিভাগ সতৰ্ক হোৱাৰ প্ৰয়োজন ৷
বিপৰীতে বনাঞ্চলিক বিষয়া গৰাকীৰ গা এৰা কাণ্ডই বন্যজন্তুৰ নিৰাপত্তাৰ দিশত ভাবুকিৰ সৃষ্টি কৰিছে বুলি মন্তব্য কৰিছে একাংশই ৷
আনহাতে বিষয়া গৰাকীৰ নিৰ্লিপ্ততাৰ সুযোগলৈ এনিমেল কৰিডৰত ট্ৰাক ৰখাই জিৰণি লৈছে চালকে ৷ বাধা দিয়াৰ বাবে পথচোৱাত বনকৰ্মীৰ অভাৱ বুলিও সচেতন মহলে উদ্বেগ প্ৰকাশ কৰিছে ৷
