ডিজিটেল সংবাদ, কাজিৰঙাঃ কাজিৰঙাৰ বচাগাঁৱত লোমহৰ্ষক ঘটনা৷ যুৱকৰ দাৰ ঘাপত গুৰুতৰ ভাৱে আহত হয় এগৰাকী বৃদ্ধা মহিলা ৷ পৰিয়ালৰ লোকৰ অভিযোগ মতে অভিযুক্ত মৃদুল বৰা ওৰফে পাপা নামৰ যুৱক জনে দীৰ্ঘ দিন ধৰি পাৰিবাৰিক অশান্তিৰ সৃষ্টি কৰি আহিছে ৷
অভিযোগ অনুসৰি প্ৰায় প্ৰতিদিনে নিজৰ পত্নীক শাৰীৰিক আৰু মানসিক অত্যাচাৰ চলাই আহিছিল মৃদুলে । শনিবাৰেও ঘৰৰ ভিতৰত পত্নীক মাৰপিত কৰি থকাৰ অৱস্থাত মহিলাগৰাকীৰ ভাতৃয়ে তেওঁক উদ্ধাৰ কৰি আনে । ইয়াৰ পিছতেই অভিযুক্ত মৃদুলে পাছফালৰ পৰা পত্নীক উদ্ধাৰকাৰী যুৱকজনক এখন দাৰে আক্ৰমণ কৰিবলৈ উদ্যত হয় ৷
সেই সময়ত দাৰ ঘাপৰ পৰা যুৱকজনক বচাবলৈ চেষ্টা কৰে ওচৰ চুবুৰীয়া এগৰাকী বৃদ্ধ মহিলাই । যাৰ দাৰ ঘাপ পৰে মহিলাগৰাকীৰ মূৰত ৷ ইতিমধ্যে আৰক্ষীয়ে অভিযুক্ত মৃদুলক আটক কৰাৰ লগতে উদ্ধাৰ কৰে দাখন ৷ আনহাতে আহত বৃদ্ধাগৰাকী সংকটজনক অৱস্থাত চিকিৎসালয়ত ভৰ্তি কৰোৱা হয় ৷
