ডিজিটেল সংবাদ,গোলাঘাট: গোলাঘাটৰ বিবেকানন্দ কেন্দ্ৰীয় বিদ্যালয়ত দুদিনীয়া কাৰ্যসূচীৰে অসম গণিত শিক্ষায়তনৰ ৩৭ সংখ্যক বাৰ্ষিক অধিবেশন আৰু অসম গণিত শিক্ষায়তন গোলাঘাট শাখাৰ উদ্যোগত দ্বিতীয় সংখ্যক গণিত মেলা অনুষ্ঠিত হৈছে । ছাত্ৰ-ছাত্ৰীসকলৰ গণিতৰ উৎকৰ্ষ সাধন আৰু গণিত বিষয়টো ছাত্ৰ-ছাত্ৰীসকলৰ বাবে মনোগ্ৰাহী কৰি তোলাৰ লক্ষ্যৰে এই গণিত মেলাৰ আয়োজন কৰা হৈছে । শনিবাৰে পুৱা পতাকা উত্তোলনেৰে এই অনুষ্ঠানৰ শুভাৰম্ভণি কৰা হয় ।
এই গণিত মেলাত অসমৰ কেইবাখনো জিলাৰ বিদ্যালয়ৰ ছাত্ৰ-ছাত্ৰীয়ে অংশগ্ৰহণ কৰাৰ লগতে গোলাঘাট জিলাৰ বিভিন্ন বিদ্যালয়ৰ বহু সংখ্যক ছাত্ৰ-ছাত্ৰীয়ে অংশগ্ৰহণ কৰি গণিতৰ পাৰদৰ্শিতা প্ৰদৰ্শন কৰিছে ।
কাৰ্যসূচী অনুসৰি ছাত্ৰ-ছাত্ৰীসকলৰ মাজত গণিতৰ আৰ্হি প্ৰদৰ্শন , গণিতৰ আৰ্হিৰ প্ৰতিযোগিতা , গণিত দৌৰ, গণিত বিষয়ক কুইজ আদি প্ৰতিযোগিতা অনুষ্ঠিত কৰা হৈছে । ছাত্ৰ-ছাত্ৰীসকলেও সুন্দৰ সুন্দৰ গণিতৰ আৰ্হি প্ৰস্তুত কৰি তাক প্ৰদৰ্শন কৰি সমল ব্যক্তিসকলৰ দৃষ্টি আকৰ্ষণ কৰিবলৈ সক্ষম হৈছে।
