গুৱাহাটী, ১৯ জানুৱাৰীঃ কামৰূপ মহানগৰ জিলাৰ দিছপুৰ বিধানসভা সমষ্টিৰ বাছনিভুক্ত হিতাধিকাৰীসকলক নতুন ৰেচন কাৰ্ড বিতৰণৰ আজি শুভাৰম্ভ কৰা হয়৷ কৰ্মশ্ৰী হিতেশ্বৰ শইকীয়া মহাবিদ্যালয় প্ৰেক্ষাগৃহত এই উপলক্ষে আয়োজিত এক অনুষ্ঠানত মুখ্য অতিথি হিচাপে উপস্থিত থাকে অসম চৰকাৰৰ কেবিনেট মন্ত্ৰী তথা কামৰূপ মহানগৰ জিলাৰ অভিভাৱক মন্ত্ৰী অতুল বৰা৷ সমষ্টিটোৰ ১৯,১০০ গৰাকী হিতাধিকাৰীক ৫৯৪৯ খন ৰেচন কাৰ্ড দিয়া হ'ব৷
আজি পাঁচগৰাকী হিতাধিকাৰীক মঞ্চত মন্ত্ৰী অতুল বৰা প্ৰমুখ্যে বিশিষ্ট ব্যক্তিসকলে আনু্ষ্ঠানিকভাৱে ৰেচন কাৰ্ড প্ৰদান কৰে৷ বাকী হিতাধিকাৰীসকলক গুৱাহাটী পৌৰ নিগমৰ ক্ষেত্ৰত স্থানীয় পাৰিষদ আৰু গাঁও পঞ্চায়তৰ ক্ষেত্ৰত পঞ্চায়ত সচিবে ৰেচন কাৰ্ডসমূহ বিতৰণ কৰিব৷ অনুষ্ঠানত উপস্থিত ৰাইজক উদ্দেশ্যি দিয়া ভাষণত মন্ত্ৰী বৰাই ৰাজ্য চৰকাৰৰ এই পদক্ষেপ খাদ্য সুৰক্ষা নিশ্চিতকৰণৰ দিশত এক বলিষ্ঠ পদক্ষেপ বুলি কয়৷ তেওঁ ৰাইজৰ সৰ্বাঙ্গীন উন্নয়ণৰ বাবে অসম চৰকাৰে হাতত লোৱা আঁচনিসমূহৰ বিষয়ে উল্লেখ কৰে৷
অনুষ্ঠানত বিধায়ক অতুল বৰা, গুৱাহাটী পৌৰ নিগমৰ পৌৰপতি মৃগেন শৰনীয়া, জিলা আয়ুক্ত সুমিত ছাত্তাৱান প্ৰমুখ্যে কেবাগৰাকী বিশিষ্ট ব্যক্তি উপস্থিত থাকে৷ উল্লেখ্য যে যোৱা ১৬ জানুৱাৰীত জালুকবাৰী সমষ্টিৰ ২২,৯৯৫ গৰাকী হিতাধিকাৰীক ৭৩৫০ খন ৰেচন কাৰ্ড বিতৰণৰ শুভাৰম্ভ কৰিছিল মুখ্যমন্ত্ৰী ডঃ হিমন্ত বিশ্ব শৰ্মাই৷ অহা ২৪ জানুৱাৰীত গুৱাহাটী চেন্ট্ৰেল, ২৫ জানুৱাৰীত নিউ গুৱাহাটী আৰু ডিমৰীয়া বিধানসভা সমষ্টিৰ নতুন হিতাধিকাৰীক আনুষ্ঠানিকভাৱে ৰেচন কাৰ্ড বিতৰণ কৰা হ'ব৷
